Vawiin khan Pu K.Lalramliana, Executive Secretary, LADC chuan LADC Hall, Council vengah ni thum awh tur, DAY-NULM Festival hawnna hun a hmang a. Urban Development & Poverty Alleviation Department buatsaih DAY-NULM Festival hawnna hun hi Pi Kerry VL Hmangaihzuali, Manager (Skills & Micro enterprise) in kaihruaiin DAY-NULM hnuai a Self Help Group-te chuan an thil siam te pho chhuakin Stall 33 an siam a ni.
Pu K.Lalramliana, Executive Secretary, LADC chuan eizawnna ngelnghet nei tur a hmeichhia te intelkhawm a, a huho a hma an lak thinna Self Help Group hnathawh chu fakawm a tih thu sawiin tanrualna pawimawh zia tichiangtu an nih thu a sawi a. Thiamthil tangkai tak tak hmang a eizawnna rintlak an neihna chuan hmeichhiate a tihhmasawn bak ah zahawmna a ken tel thu sawiin hmasawn zel tur a midangte cho chhuak a kaihruaitu ni zel turin kalkhawmte a chah bawk a ni.
Lawngtlai khawpui ah hian DAY-NULM in kum 2015 atang khan kalpui tan niin, tunah hian Self Help Group 85, Area Level Federation 4, Thiam thil zirchhuak certified trainees hi 690 vel an awm mek a. Thiam thil nei tur a hlawhtling tak a zirchhuak tawh ten sumdawnna bul an tan theih nan a pung tlem chi loan mi 125 hnen ah pekchhuah an ni tawh a. Heng bakah hian Scheme of Shelter for Urban Homeless hnuaiah Lawngtlai khawpui chhung a Child Care Institution Home ah te bungrua pek thin a ni bawk.
