Vawiin chawhnu khan National Commission for Protection of Child Rights (NCPCR), State Commission for Protection of Child Rights (SCPCR) leh District Administration of Lawngtlai District-te bultumin ‘A Campaign on Preventing and Combating Child Trafficking in 100 Bordering and Adjoining Districts of India ‘ chu DC Conference Hall- ah neih a ni a. Pi Margaret J. Vanlalremmawii (SDO, Sadar) chuan hun a kaihruai. Pi Margaret J. Vanlalremmawii, SDO (S) chuan kalkhawmte hnena lawmthu sawina a nei hmasa a. Child Trafficking chungchang inzirtirna chu August ni 1, 2022 atang khan neih tan tawh niin, kumin bikah chuan June leh July thla chhunga hman tura tih a nih angin vawiin hun hi hman a ni, a ti. Lawngtlai District bakah Mizoram pum huap ang pawhin ‘child trafficking case’ tam lo hle mahse, khawvel hmun hrang hrangah a hluar tawh hle a, tun atanga thahnem ngai taka a inven dan tur kan lo hriat chian a pawimawh hle a ti. A bik takin Lawngtlai district- ah International border- Myanmar leh Bangladesh- a awm avangin thenawm ram atanga child trafficking awm thei reng a ni tih hriaa mitin kan in ralrin a tul hle a ti a. Mizorama chengte hian thuneitute hnena thil thlen vat hi kan ngaipawimawh tawk lo hle tiin a rang thei ang bera thuneitute hrilhhriat kawngah kan harhthar a tul tak zet a ti. Dan lo taka naupang hralh leh zuar chu thil thleng thei reng a ni tih hriaa, vawiin workshop- a zirtirnate uluk taka ngaithla tur leh ‘child trafficking’ awm lo tura theihtawp chhuaha tan la turin kalkhawmte leh Lawngtlai mipute a sawm a ni.
Vawiina ‘ A Campaign on Preventing and Combating Child Trafficking in 100 Bordering and Adjoining Districts of India’ puala workshop neih ah hian Pu C. Lalremsanga, Judicial Magistrate 1st Class cum Civil Judge, Lawngtlai District Legal Services Authority- chuan resource person niin zirtirna hun a hmang a. Human trafficking chu khawvela Dan lo a sumdawnna hluar ber pathumna a ni tiin, sum leng vak 32 billion dollar vel a awm mek tiin, heihian human trafficking chungchang hriatchian a pawimawh zia a ti lang chiang hle a ti. Dan lo a mihring emaw naupang lei leh hralh chu thil thleng reng a nih avangin, chutiang laka inven dan leh hmalak dan tur hriatchian a tul hle a ti a. National Crime Record Bureau (NCRB) te chhinchiah danin India ramah kum 2022 khan Dan lova mihring lei leh hralh case 6036 a awmin, chung zinga 2878 chu naupang an ni a ti. Dan lo va puitling emaw naupang lei leh hralh hian hluar lam a pan zel nia ahriat thu sawiin, dan kengkawhtute mai ni lovin, mipui zawng zawng tangkhawm a, theihtawp chhuaha kan do a hun tawh tak zet a ni, a ti. Workshop ah hian dan in ‘Human trafficking’ a hrilhfiah dan te, Naupangten Indian Constitution- a dikna chanvo an neih hrang hrangte leh Dan hmanga hmalak dan kawng hrang hrangte zirho a ni a. National Commission for Protection of Child Rights (NCPCR) – vision leh mission chungchang leh Commission for Protection of Child Rights (CPCR) Act 2015 chu uluk taka zirho a ni bawk a. Naupang lei leh hralh kawnga Ministries, Institutions, Agencies, Establishments leh Schemes chi hrang hrang awm leh an hnathawh dan tlangpui enho a ni a. Dan lo a Naupang lei leh hralh a nih chhan bulpui ber, trafficking kalpui a nih dan tlangpui leh naupang zinga dan lo a lei leh hralh tawk awlsam bikte dinhmun tlangpui chipchiar taka zirho a ni bawk.
Pu C. Lalremsanga chuan tunlaiah chuan ‘Cyber Era’ a awm kan nih tawh angin, online hmanga child trafficking kalpui a hluar tawh hle a ti a. Naupangten zalen taka phone an khawih tawh avangin, naupang tam takte dimhmun a derthawng tawh hle a, internet kaltlangin heng naupang tam tak te hi bumchhuah an ni fo tiin, nu leh pa te kan fimkhur a tul tawh tak zet a ni, a ti. Naupang rukbo an nih atanga darkar 1 chu a pawimawh zual hle tih tarlangin, he darkar khat chhung ngei hian thuneitute hrilhhriat vat a , a tul dan anga hmalak a ngai tiin hun tamtak khawhral a nih chuan naupang chhanchhuah kawngah harsatna lian zawk a thlen thei a ni, a ti. Naupang chauh ni lo puitling, a bik takin hmeichhiate hi dan lo a lei leh hralh an tam hle a, hemi kawngah hian theihtawpa kan thawhho a tul hle tiin kalkhawmte thahnem ngai taka tan la turin a sawm nghal a ni. Vawiina ‘A Campaign on Preventing and Combating Child Trafficking in 100 Bordering and Adjoining Districts of India ‘ workhop ah hian Pu Tlualaisa Hlychho, Addl. SP, Dr. Doris Lalrinawmi, SDC, District Child Protection Officer (DCPO) leh MHIP, LWA, MUP, CYLA, BSF ai awhte bakah Juvenile Justice Board (JJB), Anganwadi Workers leh NSS, Government Lawngtlai College zirlaite an tel a ni.
