Nimin khan Mizo Zaimi Inzawmkhawm (MZI) Headquarters Lawngtlai chuan an din champhaphak vawi- 33 na lawmna TVJ Futsal Ground, Council Veng, Lawngtlaiah an nei a. Pu Donny Lalruatsanga Lawngtlai Bawrhsap chuan khuallian niin a hmanpui. Pu Donny Lalruatsanga chuan kalkhawmte hnena lawmthu sawina a nei hmasa a. MZI Headquarters Lawngtlai, ten rimawi chawisanna tura ke an pen zel chu lawmawm a tih thu sawiin, tha hnem ngai taka thawk zel turin a chah a. Rimawi hian rilru leh taksaah hahdamna nasa tak a thlen thin tih tarlangin, midangte tana tangkai taka an thiamna te hmang zel turin a fuih a.
Nun khawhar taka awmte tan a damdawi lian ber chu rimawi hi a ni tiin, rimawi tello in hringnun a mawi zo lo a, midangte tana malsawmna thlentu ni zel tura chahin Bawrhsap chuan MZI Headquarters Lawngtlai, te hma lam pan zel turin duhsakna a hlan nghal a ni. Khuallian chuan ‘Operation Jericho’ hnuaiah Ruihhlo do kalpui mek a nih thu tarlangin, hemi kawngah pawh tangkai taka tha thawhtu ni theuh turin MZI Member leh kalkhawmte a chah a. Ruihhlo do tur hian tanrual a ngai tak zet a, mimal chhungkua leh khawtlang nuam leh chhenfakawm zawk siam turin mawhphurhna mitinin an nei vek a, theihtawp i chhuah tlang ang u tiin Lawngtlai mipuite a sawm nghal bawk. Pu Joseph Lalhmingthanga Chinzah, Honorary Secretary, LDFA pawhin thutawi sawina neiin, pawl pawimawh leh tangkai tak an nihna inhriaa, ram leh hnam tana theihtawp chhuah zel turin a chah a. Rimawi hmanga inpumkhatna thlentu, mi dangte tana malsawmna, hlimna thlentu ni zel turin MZI Headquarters Lawngtlai te a fuih a ni.
He hun hmanna hi Pi VT Maduhi chuan kaihruaiin, Pu Lalawmpuia Chinzah, President, MZI Headquarters, Lawngtlai chuan kalkhawmte lawmna thu a sawi a. MZI Headquarters Lawngtlai zaipawl leh zai thiam dang thahnem takin hun an hmang a, Pu James VL Chinzah, Asst. Secretary, MZI Headquarters Lawngtlai chuan lawmthu sawina neiin hun a khar. Mizo Zaimi Inzawmkhawm (MZI) Headquarters Lawngtlai hi kum 1992 khan din niin, tunah hian Member – 400 an awm mek a ni.
