Vawiin khan Lawngtlai Bawrhsap Pu Donny Lalruatsanga chuan a Office Chamber-ah Chanchinbu mite kawmin, Pu PC Lalchunglura Sr.Superintendent of Police chuan a tawiawm.Pu Donny Lalruatsanga chuan thuthar thehdarhtute leh Lawngtlai mipuite kum thar chibai bukna a nei hmasa a. Hunpui laia buaina leh harsatna lian tham a awm loh kawngah Police, NGO, Kohhran leh mipuite inkarah thawhhona tha tak a awm tih tarlangin, kum tharah hmasawnna tha zawk nei theuh turin duhsakna a hlan nghal a ni.
Bawrhsap chuan Kum tharah Lawngtlai khawpui hmasawnna tur kawng hrang hrang duan mek a ni, a ti a. A bik takin Traffic chungchangah hmalakna lian tham tak neih tum niin, Foreigner chungchangah inkhuahkhirhna felfai zawk siam a, State sawrkarah theihluh a nih tur thu a sawi. Faina kawnga Lawngtlai khawpui chhung veng hrang hrang inelna ‘Bawrhsap Arawrd’ chu kumin Republic Day – ah sem a nih tur thu a tarlang a. Project lian zawk siam a hmalakna turah – Cheural Tlâng ( Khaw za lang tlang ) Paithar Tlâng, Ditlang hming put chhan Dîl te hmachhawpah dah a nih thu a sawi a. Ramri khar mek chungchangah natna a darh lohna tur a nih thu sawiin, inkaihhruiana felfai tak siamin, ni 11, January 2026 atanga hawn theih a nih a beisei thu a tarlang bawk.
Pu PC Lalchunglura Sr. Superintendent of Police, chuan hunpui laiah Dan leh thupek kenkawh kawngah harsatna lian tham a awm loh thu a tarlang a. NGO – te nen a thawhhonna tha tak a awm tih tarlangin, hunpui laiah case- 4, chiah ziah luh a ni, a ti. Kum 2025 chhungin case- 65, ziah luh a nih thu tarlangin, kum 2024 aiin case hi a tlahniam a ni, a ti a. Operation Jericho- kalpui vang te, NGO leh MJA te nen a thawhhona tha avang a case ziahluh ngai a tlem zel a beisei thu tarlangin thawhhona tha zawk awm turin a sawm nghal a ni.Pu Donny Lalruatsanga chuan kum liamtaa MJA te nena thawhhona tha tak awm chu chhunzawm zel a beisei tih tarlangin, hmalam hunah thawhhona tha zawk awm tura thawhpuiah a sawm nghal bawk a ni.
