Vawiin khan Lawngtlai Bawrhsap Pu Donny Lalruatsanga chuan 3rd IR Battalion, Thingkah a tlawhin, Pu Lalchhuanthanga Commandant – chuan lo dawngsawngin, Battalion dinhmun tlangpui a a hrilh a ni.
Pu Donny Lalruatsanga chuan 3rd IR Battalion chu Lawngtlai District tan an tangkaiin, khawpui daifem maia awm an nih vangin a thlamua thlak hle a ni, a ti. Mipuite nena thawhhona thatak an nei chu lawmawm a tih thu sawiin, chhawmnung zel turin a chah a. Dan leh thupek kenkawh, venhimna lam thawktu an nih angin an pawimawna hriaa theihtawp chhuah zel turin a chah a. Chhiatrupna a lo thlenin, 3rd IR Battalion – a SDRF te an tangkai thin hle tiin, an hnathawh a fakawm tak zet thu a sawi.
Bawrhsap hnena Commandant – in an mamawh zualpui, hmasawnna atana tangkai tak tak tur a thlen zingah, 3rd IR hmunpuia School din a nih theih nan LADC thuneitute a lo titipui tur thu a tarlang a. A bik takin Battalion hmunpui panna kawng bakah tui hnianghnar zawk an neih theih nan a theih anga hma lolak a tum thu a sawiin, mamawh dang an sawite pawh theih ang anga lo bawhzui a tum thu a sawi bawk.
Pu Lalchhuanthanga, Commandant chuan Bawrhsap in an hmunpui a tlawh chu lawmawm a tih thu sawiin, an Battalion hmasawnna atan hmalakpui a inhuamna ah Bawrhsap hnenah awmthu a hrilh a ni.
