Dr. Vijay Kumar Singh chu vawiin chawhma dar 11 khan Raj Bhavan Circular Lawn-ah Mizoram Governor 25-na ni tura lak luh a ni. Governor lakluhna inkhawm hi Chief Secretary Khilli Ram Meena in kaihruaiin Larsap Dr. Vijay Kumar Singh hi Gauhati High Court Chief Justice Vijay Bishnoi an Mizoram rinawmna thu tiam tirin a la lut a ni. Dr. Vijay Kumar Singh hi nikum December ni 24 khan President Droupadi Murmu in Mizoram Governor turin a ruat a, vawiina Larsap lakluhna inkhawmah hian Chief Minister Pu Lalduhoma, Assembly Speaker Pu Lalbiakzama, Leader of Opposition Pu Lalchhandama Ralte, Minister Pu K. Sapdanga, Pu Vanlalhlana, Pu Lalsawivunga, Pu Lalthansanga, Pi Lalrinpuii, Dr Vanlalthlana, Pu B. Lalchhanzova leh Pu Lalnghinglova Hmar te an tel a, Chief Minister hlui pahnih Pu Zoramthanga leh Pu Lal Thanhawla te pawh telin MLA hrang hrang an tel a, Rajya Sabha MP Pu K. Vanlalvena leh Lok Sabha MP Pu Richard Vanlalhmangaiha bakah tlawmngai pawl hruaitu hrang hrang leh sawrkar mi pawimawh an tel bawk.
Pu VK Singh-a hi a nupui Pi Bharti Singh nen nimin khan Lengpui Aiport lo thlengin, Chief Minister Pu Lalduhoma chuan Lengpui Airport-ah anmahni lawmna leh hmuahna hun a buatsaih a, vawiina lawmluhna hun zawhah hian Larsap hian Assam Rifles hotute a kawm dawn a ni.
Mizoram Larsap thar General VK Singh hi Indian Army Chief of Army Staff hlui niin he dinhmun hi kum 2010 atanga 2012 chhung a chelh a, four star General niin Indian Army hotu hmingtha tak a ni a. A hna atanga a chawlh hnuin BJP Party a zawmin Member of Parliament a ni tawh a. Ministry of Road Transport and Highways leh Ministry of Civil Aviation changtu Minister of State dinhmun chelh tawhin Hemi hma hian Minister of State for External Affairs, Minister of State (Independent Charge) for Development of the North-Eastern Region leh Minister of State for Statistics and Programme Implementation a ni tawh bawk a ni.
