Larsap kalchhuak tur Dr. Hari Babu Kambhampati chuan Mizoram boruak thianghlim, sik leh sa nuam leh ami cheng te hawihhawmna chu a hriatreng tur thu a sawi. Larsap hian vawiin khan thlahna thuchah sawiin Mizoram Governor dinhmun a chelh ni July ni 19, 2021 atanga kum 3 leh thla 5 chuang a liam hnuah a chhuah hun thlenga Mizo mipuite thlawpna ah lawmthu a sawi a, Mizoram boruak thianghlim, sik leh sa nuam leh ami chengte hawihhawmna leh inthununna tha tak chu a hre reng dawn tih sawiin Mizoram khawpui ber Aizawl chu khawpui fai leh ri bengchheng tlem, a bik takin traffic dan zawm tha leh lirthei horn hmeh rik ngai lohna khawpui ti a hriatlar a nite hi India ram hmun dangte tana entawntlak tak a ni a ti bawk.
Governor chuan Mizorama awm chhunga inthlan an kalpui dan chu state dang tan pawha entawn tlak ani a ti a, Mizo thalaite zingah thiamna leh theihna nei tam tak tak an awm tih sawiin hnam ziarang midang zirtir mai bakah hnam dangte tihdan phung leh hnam ziarangte hriat tum turin a chah bawk. Larsap chuan Sawrkar laipui scheme pawimawh tak tak Mizoramin a tangkai pui theih turte tha taka kalpui zel a tul thu a sawi a, hmasawnna ruhrel hmachhawp hrang hrang te tangkai thei ang bera hmanga hmasawnpui tum theuh turin a chah a, kum 2047-a ram hmasawn an nih theihna tur ti hlawhtling tura chahin sawrkar laipui atanga hmasawnna scheme hrang hrang ngaihven turin a chah bawk.
Governor chuan Mizorama a chen chhunga a hun hman dan chu a hre reng tawh dawn a ti a. A ngaihhlut thu sawiin Mizoramin malsawmna dawng chhunzawm zel se a duh thu a sawi bawk.
