Larsap kal chhuak tur Dr Hari Babu Kambhampati chu naktuk hian Raj Bhavan Durbar hall-ah thlah a ni dawn. Raj Bhavan atanga thu dawn danin larsap kal chhuak tur hi naktuk chawhnu dar 3 hian Durbar hall-ah Raj Bhavan a thawk official-te’n an thlah ang a. Sorkar anga thlahna hun erawh chu Aizawl a chhuahsan ni, kum thar January ni 2 khian buatsaih a ni ang a.
January ni 3 khian Odhisa khawpui Bhubaneswar Raj Bhavan-ah thutiamtir a he state larsap ni tura lakluh tura ruahman a ni. Mizoram larsap thar tura ruat General Vijay Kumar Singh lo chhoh hun tur leh thutiam a rawn lak hun tur hi a la chiang lova. Naktuk lamah chuan a chian theih tawh beisei a ni . Naktuk hian Chief Secretary Pu Khilli Ram Meena hovin official pawimawhte’n larsap kalchhuak tur, official-a thlah dan tur leh a thar, thutiamtira lakluh dan tur hi an sawiho dawn ni a thudawn a ni.
Puan tawh thin angin Odhisa larsap Raghubar Das banna President Droupadi Murmu-i’n a pawm tak avangin Thawhlehni kal ta tlai lamah khan state thenkhat a larsapte awmna siksawi a ni a. Mizoram larsap thar atana ruat General Vijay Kumar Singh hi India ram sipai lal ber (Chief of Army Staff) 24-na a ni a, Indian Army atanga a chawlh hnuah Politics-ah a lut a, kum 2014 leh 2019 Lok Sabha Inthlanpuiah khan BJP ticket-a dingin Ghaziabad, Uttar Pradesh atanga thlan tlin a ni . Prime Minister Pu Narendra Modi kaihhruai term khatnaah khan Minister of State for External Affairs, Minister of State (Independent Charge) for DoNER leh Minister of State for Statistics and Programme Implementation-te a chelh a. A term hnihnaah khan Minister of State for Road Transport and Highways leh Civil Aviation-te a lo chelh tawh bawk ani.
