Vawiin khan Mizoram Larsap Pu Indra Sena Reddy Nallu chuan Sairanga FCI Godown sak hna chawlh lailawk mek chungchanga harsatna awmte chinfel theih dan tur Land Revenue & Settlement (LR&S), Environment, Forests & Climate Change (EF&CC) leh Food Corporation of India (FCI) hotute a sawipui. Larsap Pu Indra Sena Reddy Nallu chuan hmasawnna ruhrel pawimawh siam a nih hmain nakin lawka harsatna a awm loh nana fimkhur tlan a tul thu sawiin, hemi kawngah hian a kaihhnawih department hrang hrangte inkarah thawhhona tha a awm a pawimawh thu a sawi a. FCI Godown chu Mizoram mipui tana pawimawh tak a nih avangin Sawrkar laipuiin a phut angte pawh a ranglama bawhzuia chinfel thuai tum tur leh, FCI Godown sak hna tawpsan lailawk chu tan leh thuai a nih theih nana tan la turin official-te a chah a. Project tan tawh leh kalpui mek, engemaw rokhawlhna avanga tawp lailawkte chu chinfela zawhfel thuai a tul thu a sawi bawk.
He hunah hian Sairanga FCI Godown sak hna kalpui tawh dan leh thlen chinte, Forest Department atanga Riverine Reserved Forest (RRF) tia tawpsan rih tura hriattirna (stay order) pek chungchang leh Ministry phut anga hmalak ngaite sawiho a ni a. Hemi atana Compensatory Afforestation (CF) tur ram dawnfel a nih tawh thu tarlan a ni a. FCI Godown sak mek chu project pawimawh tak leh Mizoram tana tangkai tur a nih avangin tikhawtlai zel lova puitlin thuai a nih theih nana hmalak ho dan turte pawh sawiho a ni.
He huna tarlan a nih danin Sairanga FCI Godown sak hna hi kum 2021 vel khan FCS&CA Deparment ram Hectare 3.1 vela zau hawhtira sak a ni a. Buhfai Metric Ton 10,000 leng thei tura ruahman a ni a, building pathum sak tur zingah buhfai Metric Ton 5,000 leh Metric Ton 2,500 leng building sak hna zawhfel thawkhat niin, Metric Ton 2,500 leng building pakhat leh a kentel pawimawh dangte sak hmabak a la awm a ni.
