Thlahnih chhung Lai Autonomous District Council ah Sorkar a kaltheihloh hnu ah naktuk chawhma dar 11:30 khian Lawngtlai LADC Hall ah United Legislature Party hruaitu, South Lungpher bialtu MDC, Pu C.Lalmuanthanga chu Lawngtlai DC, Pu Cheemala Siva Gopal Reddy chuan rinawmna thu tiamtirin Chief Executive Member atan a lalut dawn.
Puan tawh thin angin LADC ah Sorkar mumal a awm theihloh hnu ah Congress MDC pakhat leh MNF, MDC 12 ten United Legislature Party dinin, an hruaitu atan Congress Member Pu C.Lalmuanthanga an dah a, a ni hian Governor hnen ah LADC ah a kaihhruai United Legislature Party in Sorkar an siam theih thu a thlen hnu ah Governor hian Pu C.Lalmuanthanga CEM atan a pawmna May 9, 2024 khan a tichhuak a, Pu C.Lalmuanthanga hi CEM atan lakluh a nih hnu ah Governor in ruahmanna a lo siamlawk tawh angin May 20, 2024 ah LADC Session ah CEM atan rintawkna a hmachhawn ang.
LADC ah Congress leh MNF ten Sorkar intawm United Legislature Party din an tum chungchangah Congress leh MNF hruaitute chuan LADC ah Sorkar a mumalloh chuan a tuartu chu mipui an nih vangin, mipui tawrhna thlengzel tur ngaingam lovin Sorkar intawm siam an tum tih an lo sawi tawh a ni.
