Lai Autonomous District Council ah United Legislature Party hruaitu, South Lungpher bialtu MDC, Congress Member Pu C. Lalmuanthanga chu LADC Chief Executive Member atan Lawngtlai DC Pu Cheemal Siva Gopal Reddy an vawiin khan rinawmna thu tiamtirin a lalut. Lakluh inkhawm LADC Hall-a neihah hian CEM thar Pu C.Lalmuanthanga chuan a kaihhruai Sorkar a piantheih nan a hmalatute chungah lawmthu sawiin, Governor leh Chief Minister hmalakna chu fakawm a tih thu a sawi a, LADC ah huapzo, mipui sorkar kalpui a tum thu a sawi bawk a, langtlang taka Sorkar kalpui chu a tul tih thu sawiin, LADC Budget ringawt chu innghahna tham a nihloh vangin hmasawnna huamzauzawk dapchhuak tura tanlak a tul tih sawiin, helam hawi hi ngaihpawimawh zingah a telh tur thu a sawi.
CEM thar chuan Lai mipuite, Kohhran leh Tlawmngaipawl te, Chanchinbumite chu ram hruaina ah a tulna apiangah thurawn pe a, khalhngil a ngaih pawha neitu chanchang turin a sawm a ni. CEM thar hian Deputy Leader atan Lungtian bialtu MDC, Pu Sanghuliana a ruat thu a puang a, a thawhpuitur Executive Member dangte pawh a tihfel thuai a rinawm.
Puantawh thin angin LADC ah hian March 7, 2024 atangin Sorkar mumal a kaltheihloh hnu ah Congress MDC pakhat leh MNF MDC 12 ten United Legislature Party dinin, Pu C.Lalmuanthanga kaihhruaina hnuaiah LADC ah Sorkar thar a piang chho ta a ni. Chief Executive Member thar hian vawiin khan a Office luah nghalin Pathian hnen ah inhlanna hun hman a ni a, hemi hnu hian Lai District Congress Committee Office leh MNF District Hqrs Lawngtlai Office a tlawh nghal.
