Lai Autonomous District Council a MNF Sorkar, Chief Executive Member Pu V.Zirsanga kaihhruai chu thlawptu a neihdan tunkar Ningani khian fiah a ni dawn. LADC a Pu V.Zirsanga kaihhruai MNF Legislature Party chuan thlawptu a nei ngah tawk tawhlo tih tunhnai khan MDC 13 ten hming ziak hnanin Governor hnen ah an thlen a, he thu kalzel ah hian nimin khan, Lai Autonomous District Council Chairman chuan ningani, ni 7, chawhma dar 10:30 ah Special Session a ko a , Governor in Floor Test neitura a rawn tih angin Special Session hi koh a ni.
LADC, MNF Legislature Party a Member 9 leh an mahni thlawptu BJP, INC, ZPM leh Independent MDC pakhat theuh, an vaiin MDC 13 te chuan Pu V.Zirsanga CEM chu thlawptu a nei ngah tawklo tih Governor ah thlenin, he thu kalzel ah hian Governor chuan Pu V.Zirsanga dinhmun fiahturin Floor Test neih tura a rawn angin LADC Chairman Pu V.L.Hmuaka chuan LADC Special Session hi a ko ta a ni.
Puan tawh angin CEM Pu V.Zirsanga chuan LADC ah MNF Legislature Party ten Sorkar thatak an dinzui theih nan a dinhmun atanga inhnuhhniama, eng chanvo mah chelhloh a hrehloh thu leh MNF, MDC te chu inlamletturin a lo sawm tawh a, chanchin buatsaihlai thleng hi chuan thu kal dan chiangkuang tak hriat hleihtheih a nilo.
