Kumin January ni 1 leh August ni 12 inkar chhung khan khuarel chhiatna avangin Mizoramah mi 42-in nunna an chan. Kar kalta a Assembly inkhawma ziaka zawhna chhangin Disaster Management and Rehabilitation Minister Pu K. Sapdanga chuan nunna chan chhungte hi State Disaster Response Fund (SDRF)-in ralna pek dan tur ruahmanna a siam angin cheng nuai 4 theuhin sorkarin a ral niin a sawi a. Nunna chan hi Aizawlah district-ah tam berin mi 39 an ni a, Mamit district-ah pahnih leh Lawngtlai-ah 1 an thi bawk a ni.
May ni 27 leh 28 a Cyclone Remal-in Mizoram a nuai chhung ringawt khan mi 34-in nunna an chan phah a nih kha. Cyclone Remal bakah kumin fur chhung hian ruah a tam bakah a hma atangin nasa taka rial a tlak avang leh to thli leh thlipui tleh avangin chhiatna a thleng tam a. Nunna chan bakah in sang tam tak chu rial tla, thlipui leh ruahpui vanawn avanga leiminin a hnawl a. Kawlphetha pekna ban tlu leh hrui chat vang bakah kawlphetha semchhuah a khaihlak nasa a, leiminin kawng a tihpin phei chu tam tak a ni. Tlawng lui atanga tui pump chhohna khawl a chhiat avang leh tui a nut luat avangin cyclone Remal tleh atanga tun thleng hian Aizawl khawpui a tui sem dan chuan ngai a la awh thei rih ta lo a ni.
Hetih lai hian finance department lam atanga thu dawn dan chuan kum 2023-2024 tangka kum chhung atana Finance Commission 15-na in SDRF hnuai a Mizoram tana sum a rawn pek tura ruahman cheng vaibelchhe 41 leh nuai 60 a rawn pe tawh a, Mizoram sorkar pawhin a tum ve tur cheng vaibelchhe 4 leh nuai 80 chu a pe tawh bawk a, a vaiin cheng vaibelchhe 46 leh nuai 40 a ni a ti a. He sum hi hman a la ni lo niin an sawi a ni.
