Excise & narcotics department chhinchhiah danin kumin January thla atanga tun thleng hian ruihhlo vangin mi 62 an thi tawh a, ruihhlo hmansual avanga thite hi mipa 54 leh hmeichhia 8 an ni. Hemi tiam hian kum 1984 a heroin vanga thi pakhat chhinchhiah a nih atanga tun thleng hian Mizoramah ruihhlo vanga thi zat hi 1,874 an tling tawh a, mipa 1,649 leh hmeichhia 225 an ni a. An zinga 1,161 hi spasmo proxyvon leh parvon spa vanga thi an ni a, mi 268 chu heroin vanga thi an nih lai-in damdawi hman pawlh vanga thi hi mi 445 an awm bawk ni a chhinchhuah a ni. Kum 1984 atanga kum 1989 thleng khan spasmo proxyvon vanga thi an la awm lova, heroin vanga thi hlir an ni a, damdawi dang leh a chawlhpawlh avanga thi hi kum 1984 leh 1998 thleng khan an awm lo bawk.
Nachhawkna chak tak proxyvon leh parvon spa hi sorkar laipui-in siam a phal tak loh avangin hemi damdawi ei avanga thi hi an tlem chho tial tial a, kum 2017 atanga tun thlengin an awm leh tawh lo. Ruihhlo vanga thi an tam ber kum chu 2004 kha a ni a, hemi kum hian mi 143 an thi a, kum 2000 khan 139 thi-in kum 2003 khan mi 136 an thi bawk a. Thite hi tlem te tih loh chu proxyvon leh parvon spa vanga thi deuh vek an ni.
Kum 2016 khan heroin avangin mi 36 an thi a, hemi tih loh chu kum tinin damdawi chi hrang hrang hman pawlh avanga thi an tam ber chho zel a, nikum phei kha chuan thi zawng zawng 76 kha damdawi chi hrang hrang khawih pawlh vanga thi vek an nih thu excise & narcotics department hotute chuan an sawi a ni.
