January ni 1 leh nimin khan African Swine Fever (ASF) vawk pulhri avanga vawk thi leh suat a awm loh avangin kumin 2025-ah ASF vawk pulhri avangin vawk thi leh suat a la awm lo a ni.
Animal Husbandry & Veterinary department hotute’n an chhinchhiah dan chuan kum hlui 2024 February ni 9 a Champhai district Leithum khua a ASF vawk pulhri vei an finfiah atanga nikum chhung zawnga he vawk pulhri avanga vawk thi zat chu 14,950 a ni a. Vawk pulhri darh zel tur venna atan vawk 24,177 suat a ni bawk. Mizorama vawk pulhri leng hian thlasik intan November atang khan zia-awm lam a pan chhova, mimalin vawk tam tham an vulhna hmun pulhri-in a luh chilh avanga thi leh suat tam ni deuh a awm leh zauh thin chungin a zia-awm chho zel a. December thla khan thi leh suat a tlem tawh hle a ni.
March ni 21, 2021 khan Lunglei district a Lungsen khua-ah ASF vawk pulhri vei hi finfiah hmasak ber a ni a. Hemi atanga nikum thlenga he vawk pulhri avanga vawk thi zat chu 62,167 a tling tawh a. Kum 2021 khan vawk 33,417 thi-in kum 2022 khan 12,761 thi-in niklum khan 1,039 a thi leh bawk a ni. Vawk suat zat hi kum 4 chhung hian vawk 49,267 suat a ni a. ASF vawk pulhri avanga Mizoramin vawk a chan zawng zawng hi nuai 1, sing 1, sang 1 leh 434 zet a ni.
