Sorkarin hunpui vuakveta halpuah leh halmawi a khapna kawngah YMA leh Police tangkawpin mipui hnena ngenna leh hriattirna kawng hrang hrangin a kalpui mek. Aizawl District hnuaia police station hrang hrangte chuan khapna thupek hi bawhzuiin theihtawp chhuahin halpuah leh halmawi zuar leh kawl dap hna an thawk mek a. Dawr, kudam leh lirthei hrang hrangte, transport leh courier service te endik an nih bakah online a zuar thinte pawh theih ang anga chhui zui an ni bawk.
Aizawl Police-te chuan sorkarin khapna thupek a chhuahte zawm theuh turin mipui an ngen a, halpuah leh halmawi hal chu mihring hriselna atan a that loh mai bakah ranvulh te’n an thihpui thin avangin thupek te zawm a, Police in thupek an kenkawh kawngah thawhpui turin a sawm a ni.
Central YMA pawhin sorkar phalloh thil halpuah leh halmawi te hal lo tur leh zuar lo turin mitin a ngen a ni. Branch YMA hrang hrangte mahni huamchhung theuhvah theihtawpa tanla turin a ngen a. Veng tinah pawh aurinna leh banner hmangte inhriattirna hi tih chhuah a nih bakah social media lamah pawh halpuah leh halmawi tel lova kumthar hmang tura ngenna te siam a ni bawk.
