Kum 2018 leh 2024 inkar (kum 7) chhung khan Mizoramah chenna in 278 a kang a, kangmei chhuakah hian mi 22 an thi. Directorate of Fire & Emergency Services in an chhinchhiah danin nikum (2024) chhung ringawt khan Mizoramah in 40 a kang a, kangmei avanga thi hi 4 an awm a. Kum 2018 leh nikum inkar chhung khan in 278 kang chhia-in mi 22-in nunna an chan phah a. Kum 2021 khan in kang a tam ber a, in 71 a kang a, hemi kum hian kangmei chhuak avanga thi an awm lo hlauh a. Kum 2022 khan in 34 a kang a, hemi kum hian kangmei vanga thi an tam ber a, mi 15 lai an thi a. Kum 2019 khan in 28 kangin mi 3 an kanghlum bawk. Kum 7 chhung hian kangmei vanga hliam hi mi 42 an awm a, nikumah khan hliam an awm lo tih loh chu kumtinin hliam an awm a ni.
Fire & Emergency Srvices chhinchhiah dan chuan kum 7 chhunga chenna in kang avanga thil kang chhia hi cheng vaibelchhe 78 leh nuai 32 chuang hu zet a ni a. Kangthelhtute’n kang mei an thelh mih avanga bungrua leh thil chi hrang hrang hum hi cheng vaibelchhe 196 leh nuai 98 chuang hu niin an sawi bawk a. Kum 2021 khan kangmei avanga bungraw chhia hi a tam ber a, cheng vaibelchhe 26 leh nuai 93 hu vel zet a kang ral a, hemi kum vek hian kangmei thelh vanga bungraw hum hi tam berin cheng vaibelchhe 83 leh nuai 33 chuang zet hu ni a chhut a ni.
Hetih lai hian Mizoram environment, forests & climate change (EF&CC) department chhinchhiah dan chuan nikum chhung khan hmun hrang hrangah vawi 3,612 kangmei a chhuak a, kangmei chhuak avanga ram kang zau zawng hi hectare 3,917 point 74 lai a ni a. Ram kang zingah hian ramngaw-ah vawi 116 zet kangmei chhuakin ramngaw hectare 94 point 5 a zau a kang chhia a, tlangram vahchap hal avangin kangmei vawi 3,496 a chhuak a, a kan chhiat zau zawng hi hectare 3,823 point 24 zet a ni bawk.
