Prime Minister Narendra Modi chuan Mizoram a tlawh hmasak leh tun inkarah hmasawnna tam tak a awm tih sawiin Mizoram chhunga inkalpawhna tura hmasawnna alo tiam tawh chu a takin a hmuh theih tih a sawi. Prime Minister chuan nimin khan website kaltlangin he thu hi tarlangin Mizoramah kum 10 chhungin hmasawnna tam tak a thleng a ti a, Sawrkar laipuia flagship program hrang hrang avangin mipuiten hmasawnna tam tak an hmuh phah tiin mi zawng zawng huap zo ani a ti a, PM Garib Kalyan Yojana hnuaiah ramchhunga mi vbch 80 chuangin ei tur a thlawnin an dawng tih sawiin Mizoram chhungah mi nuai 6 sing 8 in an dawng ve a ti a, Pradhan Mantri Awas Yojana hnuaia insak tanpui dawng Mizoram ah mi sing 6 sang 9 lai an awm tih sawiin Jal Jeevan Mission hnuaiah Mizoram thingtlanga cheng zawng zawng ten tui herh haw na an nei tawh tih a sawi.
Prime Minister chuan PM KISAN hnuaiah Mizoram kuthnathawktu sing 7 sang 7 an inziak lut a ti a, account hawng zingah hian zaa 53% chu hmeichhia anni tih sawiin Uttar Poorva Transformative Industrialisation Scheme, 2024 (UNNATI – 2024) chu pawm fel anih hnuah hmarchhak state-a thalaiten thawh tur an neih theihna tur ruahman ani dawn tih a sawi.
PM SVANidhi scheme hnuaia kawng sira inzuar mi 2,100 te chu tanpuina pek anni tawh a ti a, ramchhunga inkalpawhnaah hmasawnna lian tak a awm tih sawiin kawngpui leh rel kawng tam tak siam thar a ni a ti a, hengah hian kawngin a pawh ten eizawnna an neih theih phah tih a sawi. Prime Minister Narendra Modi chuan Mizoram hmasawnna chu mi zawng zawng huapzo leh ngialnghet tak a ni a, kum sawm kalta chhunga Mizorama inthlak danglamna thlentu chuan hmalam hunah beiseina lian zawk pe turin a duh tih sawiin State chuan hmathlir thui tak neiin mipui nena thawk hoa hmasawn tum zel turin a chah a ni.
