Vawiin khan Kolasiba thli leh ruah sur nasa avanga hmun hrang hrang a chhiatna thleng ah chhanchhuah leh chhawmdawl hna thawh vat a nih theih nan Pu John LT Sanga, Deputy Commissioner chuan a pisaah Department thenkhat a thawktute nen thutkhawmna a nei a. Chhiatna thlenna hmun hrang hrang hi a hmun ah endikin a tul dan azirin chhawmdawlna hna thawh nghal a ni.
Kolasib Hmarvenga Pi Vanlalhmangaihi in luah lai chu nizan khan leimin in a minpui a, in a awm te hi an chhuah hman avangin hliam tuar an awm lo.He In chhia senghawi hna hi Kolasib Hmarveng khawtlang chuan vawiin khan ruahsur hnuaiah an thawka, Kolasib DC Pu John LT Sanga chuan chhiattawhna hmun hi tlawhin hnatlang thingpui inna tur sum pein, a tul a an hman turin Hmarveng YMA hnenah Silpouline a pe bawk. Chhiattawk chhungte chu Disaster sum atangin tanpuina awm thei ang angte ngaihtuahpui an nih tur thu DC chuan sawiin, hei bakah hian Kolasib Electric Veng a thing tlu in Gorkha Middle School Building a delh chu DC hmalakna in a theih ang anga senghawi hna thawh nghal a ni.
Kolasib district chhungah thlipui avang hian chhiatna thleng neuh neuh awmin, hriat theih chin ah Bukpui khua a Pi Lallawmkimi In chu a chung zahve thli in a hawk a, Bairabi Police Station a Police Quarter pakhat pawh thli in a chung zahve a hawk bawk. National Highway hmun thenkhatah thing tluin hun engemaw chen chu kawngpui a dang a, amaherawh chu heng te hi thenfai a ni a, hmun hrang hrangah Electric ban tlu leh thing tluin hrui a tihchhiat hmun 13 vel ah awmin, khaw thenkhat chu eng pek theih a ni lova, a theih ang angin P & E deptt. in a chhe lai zawn leh a chhia siam hna an kalpui mek bawk a ni.
