Vawiin khan District Agriculture Marketing Committee (DAMC), Kolasib District buatsaihin ‘Sentitization cum Consultation Meeting on Thlai Thar Marketing under Hand Holding Policy 2024’ chu Kolasib DC Conference Hall-ah neih a ni a. Kolasib Deputy Commissioner leh District Agriculture Marketing Committee Chairman ni bawk Pu Robert C. Lalhmangaiha chuan he hun hi a kaihruai a ni. Hun kaihruai tu Kolasib DC Pu Robert C. Lalhmangaiha chuan thusawina neiin, Kolasib chu thlai thar tamna hmun a nih mai bakah, State luhka a nih angin thlai thar chawkluh leh thawnchhuahna kawngah pawh hmun pawimawh tak a nih thu a sawi a. Bana Kaih Policy hnuaia Thlai Thar hralhna kawngah pawh hmalakna tur tam tak a awm tur thu sawiin, he Policy hnuaia Sawrkar ruahmanna te chak tak a kalpui a; a hlawhtlin theih nana theihtawpa ke pen turin he huna kalkhawmte chu a sawm nghal bawk.
Er. Vanlalmuanpuia Chhangte, Member, Mizoram Agriculture Marketing Board chuan Mizoram Sawrkarin a buatsaih Bana Kaih (Hand-Holding) Policy sawi zauna a nei a. Pu H. Lallianzuala, Member, Mizoram Agriculture Marketing Board chuan Powerpoint Presentation hmangin Bana Kaih hnuaia ‘Thai Thar Marketing’ chungchangah zirna a pe bawk. Mizoram Agriculture Marketing Board (MAMB) hi February ni 14, 2024 khan Mizoram Sawrkar chuan a lo din tawh a, October ni 8, 2024 ah hemi Board hnuaia hian District Agriculture Marketing Committee (DAMC) din a ni a. DAMC-te mawhphurhna hian Bana Kaih hnuaia ‘Thlai Thar Marketing’ mumal taka kalpui a nih theih nan hmalakna neih a ni dawn a. Chung zingah chuan Loneitu Pawl (Farmer’s Co-Operative Society) rintlak thlan chhuaha, buaipui leh zirtir ngai zirtirte, District chhunga thlaithar dahna tur Warehouse, Godown leh Marketshed dapchhuahte, Post Harvest Infrastructure Facilities dinna tur ngaihtuahte leh thlai thar zat leh hralh zatte Record mumal taka siamte a ni.
Mizoram Sawrkarin mipuite hmasawnna tura huang a buatsaih ‘Bana Kaih Policy’ hnuaia Loneitute hamthatna tur ‘Thlai Thar Marketing’ zirchianna hun Kolasib District a neihna ah hian MAMB leh DAMC Member-te, Sawrkar Department hrang hranga hotute leh Bank Manager-te an tel a ni.
