Kolasib District Land Owners’ Association (KDLOA)-in tukin dar 6:30 atanga NH 06 leh NH 306 dan chah an tum chu chhan hrang hrang avangin vawiin tlai dar 3:30 khan tiam chin awm lovin an ti tawp a, Kolasib DC leh Senior SP, Kolasib te chuan hriatpuina hming an ziah hnan ve bawk. JAC, LOA Kolasib District ten demand an siam chungchangah Chief Secretary Renu Sharma hovin vawiin khan thuineitute an thukhawm a, Supreme Court in ram chungchanga buaina chingfel tura state sawrkar a hriattir chu chak taka hmalak ani tih an hriat avangin ram neitute hian an nawrh chu tiam chin awm lovin tih tawp an rel ta a ni. Kolasib District Land Owners’ Association ten Mizoram leh Silchar inkar kawngpui dan an tumna lamah hian vawiin chawhma lamah khan police nen an innawr buai a, hliam tenau tuar an awm nual nia thudawn a ni.
Puan tawh angin KDLOA hian lungawilohna lantir nan Seṭhawn a RTP Farm-ah lirthei dan chah an tum a, Ram neitu sang 2 chuang intelkhawm Kolasib District Land Owner’s Association hian kum 3 chuang hma la thei lova an ram khuahkhirhna chu sut thuai se an duh tih an thuchhuahah an tarlang a. Ram neitu nihna chingfel thuai tura sawrkar phutin RRF Notification 1965 chu ram hmasawnna daltu a nih thu leh thiah ni se an tih thu an sawi a. Four Lane Project pawh tihlawhtling tura phutin heng an thil phut hrang hrang te ngaih pawimawh a hlawh theih nan Silchar leh Aizawl inkar kawng hi dan an tum a ni. Forest Minister Pu Lalthansanga chuan Kolasib District Land Owner’s Association ten ram neitu nihna chingfel tura sawrkar an phut chungchangah sawrkarin an harsatna sutkian tumin theihtawp a chhuah a ti a,
Minister sawi dan chuan, Thawhtanni kalta khan ram neitute nen thukhawmin an harsatna sukiang tura hma a lak dan sawrkarin a hriattir, a ti a. Kawng dan an tum chu thulh turin a ngen tih sawiin Roadside Reserve Forest Notification (1965) chungchangah Supreme Court-in Gauhati High Court hnena a thupek chu nghak turin a ngen tih a sawi bawk. Tun hnai khan Supreme Court chuan Gauhati High Court hnenah thupek chhuahin Forest Department in an appeal chungchangah thla thum chhunga thutlukna siam turin a hriattir a, Court chuan Mizoram Chief Secretary-in Mizoram sawrkara Forest leh Revenue Department-a Secretary-te nen thukhawmin department pahnih inkara buaina awm chu chingfel turin a thu a pe bawk a ni.
