Vawiin chawhnu khan Deputy Commissioner Conference Hall ah ‘Kolasib Land Committee’ chu an Chairman Pu Robert C. Lalhmangaiha, Kolasib District Bawrhsap kaihhruaiin an thukhawm a, House Pass leh Land Lease dilna lut hrang hrangte an thlir ho.
Meeting ah hian Member Secretary, Pi Lalvenhimi Ralte, Settlement Officer, Kolasib District chuan Land Committee chu Quarter tin a thukhawm tur an nih laiin harsatna awm avanga an thutkhawm zin theih thin loh thu a sawi a. Tun thutkhawmah hian Land Lease dilna lut 24 leh House Pass 37, a vaiin 61 a nih thu a sawi a. Land Committee-a ngaihtuah tura chhawpchhuah te hi a hmun pawh teh fel vek tawh, Surveyor report pawh chhuak deuh vek tawh a nih thu sawiin, land lease thenkhat erawh kar thar lama report chhuak mai turte a awm thu a sawi.
Settlement Officer chuan Land Committee a ngaihtuah tura chhawpchhuah turah hian ram/inhmun diltute Originality ngaih pawimawh tur a nih thu sawiin, Mizoram khua leh tui ngei an ni tih te, Ram inthuah a awm leh awm lohte, Development Project ti khaihlak thei emaw, khawtlang tan harsatna a siam em tihte ngaih pawimawh a nih thu a sawi bawk. Land Committee thutkhawmah hian dilna lut hrang hrangte thlir ho a ni a. Village Council ten an dinhmun te an sawi chian hnuah dilna lut thenkhat chu Recommend tura pawm a ni a, a then erawh la ennawn leh tura dah a ni bawk.
