Kolasib District a lirthei neitu leh Driver pawl hrang hrang pangaten Vairengte – Sairang leh Bairabi – Kolasib inkar Kawngpui -National Highway dan chah mekah boruak duhawmlo thleng a awm hriat a ni lova, Vawiin a ni 2-na turin Kawngpui dan chah hi kalpui chhunzawm a ni a, Puan tawh angin nimin khan Kolasib DC Pu Robert C. Lalhmangaiha chuan a pisa ah Kolasib District MJA hruaitute kawm in, an hmalakna hrang hrang a hrilhfiah a. DC chuan, Sethawn (RTP farm bul) leh Kawnpui Quarry bula Kawng chhe zual lai siam that anih theih nan a hma an lak dan te sawiin, Kawngpui chhe zual lai hi ni 15 chhunga siam tha vek turin NHIDCL hotute leh Contractor te hriattir annih tawh thu a sawi a, an hmalakna ngai chang a, an beisei anga an siamtha lo anih chuan tun aia na in Contractor leh NHIDCL hotute nawr leh anih tur thu a sawi.
Hetianga hmalak anih avang hian Road Block huaihawttute chu an thil kalpui mek chu mipuite hmakhua ngaihna avangin titawp se a duh thu a sawi. DC chuan, Kawngpui chhe zual lai siam dan thli thlai a, a tul anga a hmuna endik leh viltu tur Working Group din anih tawh thu leh chu Working Group chu Pu H. Lalramliana, Kolasib SDO (S) kaihhruaina hnuaiah din anih thu a sawi a. Tun dinhmunah Kawngpui chhe zual lai thawm that chu an ngaih pawimawh ber anih thu a sawi.
Kolasib District MJA member te a kawmna ah hian DC hi SP Pu David H. Lalthangliana; DRDO Project Director Pu Lalmuan Puia; SDO (S) Pu H. Lalramliana; DLAO Pu ST Lalhmingmawia leh DIPRO Pu David A. Lalhmingchhuana ten an tawiawm a ni.
