Lok Sabha MP Inthlanpui, 2024-a Kolasib District chhunga Electronic Voting Machine (EVM) hman tur lo thlen belhte chu vawiin khan Kolasib DC Conference Hall-ah endikna (first level checking) kalpui ve leh a ni.
Kolasib District-a EVM leh VVPAT hman tur tam zawk chu kumin February ni 13 – 16 inkar chhung khan endik a lo ni tawh a. Tun ṭumah hian EVM 25 (Control Unit 20 leh Ballot Unit 5) lo thlen belhin, first level checking (FLC) nei turin a siamtu Electronics Corporation of India Limited (ECIL) aṭangin engineer pahnih an lo kal a.
Election official-te leh political party hrang hrang ai awhte hmuh laiin khawlte hi inthlannaa hman tlak a nih dawn leh dawn loh an endik a. Endikna pal tlangte hi uluk taka chhinchhiah thlap niin, khawih danglam theih loh turin strong room-ah kalh hnan zel a ni.
