Kolasib District chhunga Kawngpui chhia te siam that anih theih nana Kawngpui siam mek en pui tura din Working Group chu vawiin chawhnu dar 2 khan Kolasib DC Conference Hall-ah an ṭhukhawm a, he hun hi an Chairman Addl DC Pi B. Malsawmtluangi’n a kaihruai a ni.
Vawiina Working Group meeting chuan Kawngpui siam hna thawh mek te chak zawka kalpui anih theih nan hnathawhna hmun ah en pui (visit) nise, an ti a, a hmasa ber atan naktuk (4/9/24) hian Kawnpui SDO (C) kaihhruainain Kolasib leh Durlui (Sairang thlen hma) inkar en nise, an ti. Hei bakahah hun remchang hmasa berah Vairengte leh Kolasib inkar leh Bairabi leh Zero Point (Kolasib bul) inkar te en leh nise an ti a, en puitu tur pawh meeting chuan a ruahman nghal a ni.
Meeting chuan Serkhan leh Saiphai inkar pawh en pui nise an ti a, hemi chungchang hi chu Kolasib DC in ruahmanna a siam dan ngaih chan nise, an ti. Kawngpui chhe zual siam that hun chhung atana Inremna anlo siam tawh pawh sei chungchang (extension of agreement) chu a ngai angin kal phawt ni se an ti bawk a ni. Working Group hi thla kalta August ni 22 a lirthei neitu leh enkawltu pawl hrang hrangin Vairengte leh Sairang inkar leh Bairabi leh Kolasib inkara lirthei kal dan chah (Road Block) an huaihawt hnu, Road Block an tihtawp (call off) hnu a Kolasib DC hova din a ni.
He Working Group ah hian Kolasib Addl DC Pi B. Malsawmtluangi chu Chairman niin, member ah pawl hrang hrang aiawh mi 25 an tel a, an zingah hian PWD, Police, sorkar lam aiawh, MJA, YMA, lirthei neitu leh khalhtu aiawh te leh NHIDCL aiawhte an tel a ni.
