Mizoram Kohhran pariatte thawhhona tur Council of Churches in Mizoram (CCM) inkhawmpui chu nimin khan Mission Veng Presbyterian Kohhran Biak inah hman a ni a, vawiin chawhma inkhawmah khan hawn a ni.CCM hawnna inkhawmpui hi Mizoram Synod Moderator Rev. R Vanlalnghaka’n kaihruaiin rorelin hun hman a ni a. Inrinni khan rorel inkhawmpui hmasa ber tanin sum ruahman leh hmachhawp hrang hrangte ngaihtuah a ni a. Rorel inkhawmah hian kohhran pariat – Mizoram Presbyterian Kohhran, Mizoram Baptist Kohhran, Evangelical Church of Maraland, Isua Krista Kohhran, Lairam Isua Krista Baptist Kohhran, Independent Church of India, Evangelical Free Church of India leh Wesleyan Methodist Church, Mizoram-te atangin palai 521 an tel a ni.
Vawiin chawhma inkhawmah Mizoram Synod Moderator leh Joint Committee Chairman Rev. R Vanlalnghaka’n CCM hi a hawngin CCM hruaitu atana ruat mi 7-te chu chu Rev. Dr. H. Remthanga’n a dah nghet a. Chief Minister Upa Lalduhoma leh North East India Christian Council (NEICC) general secretary Rev. Ramengliana Sailo te’n chibai bukna thu an sawi bawk a. CCM hruaitu atana thlan chhuah a dah ngheh takte hi President Rev. Dr. R. Lalbiakliana (BCM), Vice President Rev. B. Zazawna Lai (LIKBK) leh Rev. Lalrodinpuia LS Nghaling (IKK Bualpui Ng), General Secretary Rev. Dr. Lalhmangaiha (MPC), Jt. Secy. Rev. T. Salaw (ECM), Treasurer Upa R. Lalmalsawma (MPC) leh Fin. Secy Rev. Jessai L. Neitham (EFCI) te an ni.
CCM hawnna inkhawmah hian Joint Committee-in an sawm angin MLA 26, central YMA president leh kohhran inpumkhatna atana a tir atanga hmalatu Mizoram Theological Association (MTA) hruaitute bakah kohhran hrang hrang atangin mi thahnem tak an tel a ni. Council of Churches in Mizoram (CCM) hawnna inkhawmpui thupui atan “Kohhran Inpumkhatna” tih hman a ni. CCM – ah hian Mizoram Kohhran pariat an tel meka, member 3,000 nei chin tan tel theih a ni.
