Mizorama kohhran hrang hrang inpumkhat tura tan lakna chuan a vawrtawp thleng mekin kohhran 8-te chuan thla thar October ni 27 khian Council of Churches in Mizoram (CCM) din an tum thu an puang. Zirtawpni a Mizoram Baptist Kohhran hmunpui, Lunglei Serkawn a kohhran hrang hrang aiawh mi 41 thukhawmte chuan October ni 26-ah rorel inkhawm kovin a tuk October ni 27 (Pathianni)-ah Aizawl Mission Veng Presbyterian Kohhran biak-inah CCM din a nih tak thu puan ni se tiin thutlukna an siam a.
Baptish kohhran general secretary leh CCM dinna atana committee secretary Rev. R. Lalbiakliana chuan kohhran inpumkhatna pawla executive committee member tur atana kohhran hrang hrangin an rawn thawhkhawm 50 a nih tawh thu leh, kohhran hrang hrangin kum khat atana an thawh khawm sum ruahman lawk cheng nuai 27 a luh tawh thu a sawi a. CCM pisa atan hian Aizawl Mission Venga Synod Conference Centre chu hman a ni dawn a. Hnathawk tur lak chungchangte pawh Zirtawpni-ah chuan sawiho a ni.
Tuna Council of Churches in Mizoram a tel tawhte chu Mizoram Presbyterian Kohhran, Mizoram Baptist Kohhran, Evangelical Church of Maraland (ECM), Lairam Isua Krista Baptist Kohhran (LIKBK), Evangelical Free Church of India (EFCI), Isua Krista Kohhran (IKK), Wesley Methodist Church Mizoram (WMCM) leh Independent Church of India (ICI) te an ni.
