Khelo India University Games mipa football chu vawiin khan Aizawl Mualpuia Rajiv Gandhi Stadium-ah khelh chhunzawm leh a ni a, inkhel pahnih a awm. Inkhel hmasa zawkah Guru Nanak Dev University chuan Gurwinder Ram-a goal khat khung hmangin University of Calcutta chu si khat faiin an hneh. Guru Nanak Dev University hi vawi hnih an inkhelh tawhah vawi khat an chakna a ni a, khelh hmabak match khat dang an la nei. University of Calcutta erawh an khelh tawh pahnihah an chak lo ve ve.
Inkhel hnuhnung zawkah University of Calicut chuan Punjab University chu si hnih faiin an hneh thung, goal pahnih hi Shamnad KP-a leh Rahul Venu te khung niin, match hnih an khelh tawhah an chak ve ve a ni. Punjab University hi an match hmasaah vawi khat an chak ve tawh thung.
Naktuk hian a hmun ngaiah inkhel pahnih a awm leh dawn. Chawhma dar 11:00-ah Adamas University leh University of Kerala te an inkhel ang a, chawhnu dar 2:00-ah Mahatma Gandhi University leh Shivaji University te an intum ve bawk dawn a ni.
