Vawiin chawhma dar 11 khan Khawzawl District Hospital (OPD kawt) ah Stop Diarrhoea Campaign neih a ni a, District Bawrhsap Pu K. Vanlalthiana chu khuallian a ni. Thupuiah hian “Kawthalo ven nan faina leh ORS a pawimawh” tih hman a ni. Khuallian Pu K. Vanlalthiana’n campaign hawnna a nei a, thu sawiin faina leh hriselna kawnga hma la zel turin a chah a, kawthalo avanga nunna chan awm tawh lo se a duh thu leh chumi atan thawktute pawhin tan la tur leh mipuite pawhin zawm tur te tha taka zawm turin a chah a ni.
‘Stop Diarrhoea Campaign’ hi kawthalo do beihpui thlakna, kum 2014 atanga lo hman tan tawh niin kum tin fur ruahtui tam hma/tam laia hman thin a ni. Mizoramah pawh India ram hmun hrang hrang rualin lo hman tawh thin a ni a; kumin pawh hian campaign hun chhung hi 2nd June – 15th June, 2025(Preparatory Phase) 16th June – 31st July 2025 (Implementation Phase) chhunga hman leh tur a ni. National Health Policy 2019-in a tum danin naupang thihna naupiang 1000 zelah 39 (2016) atanga 23 (2025) ah tih tlakhniam tur a ni a. Naupang kum 5 hnuai lamah kawthalo vanga thi 4.8% an la ni reng a. India ramah kum tinin naupang kum 5 hnuai lamah mi singnga velin an la tih phah reng a ni.
STOP Diarrhoea campaign chhung hian naupang kawthalo enkawl nana tha ber ‘ORS leh Zinc’ thatna nasa lehzual zawka inzirtirna pek a ni leh dawn a. ASHA-ten an mahni bial chhungah naupang kum 5 hnuai lamte hnenah kawthalo enkawlna turin ORS an sem ang a. Sawrkar damdawi in leh Subcentre-ah te leh Anganwadi Centre-ah te ‘ORS-Zinc Corner’ siam a ni ang. Heng hmun siam bikah hian naupang kawthalote chu enkawlna pek an ni ang a. ORS siam dante, Faina chungchangte leh ORS leh Zinc pawimawhna te a hmuna thawktuten an hrilh thin dawn a ni. A tawp khar nan Pi Rochuangkimi Zadeng, Health Supervisor-in lawmthu sawina hun a hmang. He hunah hian PHED SDO Pu Freddy Vanlalmuanawma, MHIP te, VC lam atang te, Hospital staff te an tel a ni.
