Vawiin khan ADC Chamber-ah Indian Armed Forces-a (Army, Navy, Air Force) “Agnipath Scheme” hnuaia Khawzawl District thalaite a tam thei ang ber an luh theihna turin Addl. DC Pu K. Zorammuana leh Army Recruiting Office hotu Aizawl atanga lo kalte nen hmalakna tur sawihona neih niin hemi hnu hian Govt. Khawzawl College-ah Awareness Campaign neih nghal a ni.
Agniveer scheme (Agnipath Scheme) hi June 2022-a launch niin, Armed Forces (Army, Navy leh Air Force) a sipai lakna dan thar a ni a, Agniveer-a lak luh te hi kum 4 chhung atan niin, kum 4 an thawh zawhah hian a thiam leh ti tha zual 25% te chu sipai hna pangngaiah lak luh (permanent cadre) leh an ni ang a, a bak 75% te chu an chhuak thung ang. Hlawh hi a kum khatnaah thla tin ₹30,000 atangin a intan ang a, a kum li naah chuan ₹40,000 an a pung ang. Kum 4 an thawh zawha an chhuah hunah, ‘Seva Nidhi Package’ tiin pawisa fai nuai 11.71 vel pek an ni ang. He pawisa hi tax awm lo tur a ni a, an thawh chhung hian cheng nuai 48 hu Life Insurance (non-contributory) pek an ni bawk ang. Agniveer-a thawk chhuak (permanent-a tling lo) te hian pension leh gratuity hamthatna an dawng lo thung a ni.
Kum 17.5 atanga 21 inkar an ni tur a ni a, General Duty (GD) tan Class 10 pass a ngai a, a dangah chuan Class 12 pass ngai a awm bawk. Kum 4 an thawh zawhah hian ‘Agniveer Skill Certificate’ pek an ni ang a, class 10 pass-a lut te chu class 12 pass-a chiar theihna certificate pek an ni bawk ang. Mizoram-ah hian Army Recruitment Office (ARO), Aizawl-in recruitment rally leh exam-te a buaipui thin a, Inziahluhna (Registration) hi www.joinindianarmy.nic.in ah tih thin a ni a, tlawmngaia candidate-te puihna ‘Helpline’ pawh ARO Aizawl leh Assam Rifles-ah te siam thin a ni.
