Vawiin khan Khawzawl DC leh DEO ni bawk, Pu K. Vanlalthiana chuan DC Meeting Hall-ah General Election to Village Council, 2025 neih tur chungchangah thuthar thehdarhtu (journalist) te ko khawmin press briefing a neih pui a, inthlanpui atan inbuatsaihna hrang hrang te hetiang hian a sawi.
Mizoram District 9-a Village Councils term chu ni 19 February, 2025 hian a lo tawp dawn ta a, Constitution of India Article 243K in thuneihna a pek dung zuiin sub-rule (1) of Rule 3 of The Mizoram (Election to Village Councils) Rules, 2014 in mawhphurhna a pek angin State Election Commission, Mizoram chuan Mizoram chhunga Village Council – 544 te tan inthlanpui vawi 21-na tur chu ni 12 February (Nilaini), 2025 hian a buatsaih dawn a ni.
