Vawiin khan Khawzawl District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Khawzawl District Bawrhsap Pu K. Lalrohlua hovin Khawzawl DC Meeting Hall-ah an ṭhu khawm. Chairman Pu K. Lalrohlua chuan member kalkhawmte inlawmna thu sawiin, Khawzawl District hmasawnna atana thawhpui zelah a sawm a. Inhmelhriatna hun neih zawhah rorel tan a ni. He hunah hian meeting hmasa January ni 24,2024 a DCC meeting minute chu pawm a ni a. October – December 2023 Quarter chhunga Khawzawl District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.
Meeting hian Khawzawl District chhungah pawisa thir (coins) a len tam theih nan Bank hrang hrang te hmalak dan tur a ruahman a. Pawisa thir nawi hi tualchhungah a tam chuan thil man tih hniam kawngah pawh nghawng a neih beisei a ni. Reserve Bank of India in ‘Clean Note Policy’ a siam chungchang pawh he hunah hian tarlan a ni a. He policy hnuaiah hian mipui ten pawisa (note leh coins) tha an neih theih nan, pawisa tha tawk lo te chu Bank ten mipuite hnena pe chhuak lovin RBI hnenah an thehlut zel dawn a ni. Meeting-ah hian Khawzawl District chhunga Bank ten sum an vawn dan (Currency Management) chungchang te, sawrkar laipuiin mipuite hamthatna atana a duan Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY) leh Atal Pension Yojana (APY) chungchang te sawiho a ni a.
Khawzawl District chhunga Bank ten mipui sum dahluh (deposit) atanga sum an puk chhuah tir zat Cash Deposit Ratio thlirhona te neih a ni a; Bank ten Kisan Credit Card (KCC), Agriculture, Housing Loan, Education Loan, Pradhan Mantri Employment Generation Programme (PMEGP), Pradhan Mantri MUDRA Yojana (PMMY), Self Help Group (SHG) Credit Linkage, National Urban Livelihood Missions hnuaia Self Employment Programme an kalpui dan te thlir ho a ni bawk.
Meeting-ah hian 22-Tuichang AC bialtu Pu W. Chhuanawma aiawh te, Khawzawl District Consultative Committee membe – sawrkar Department leh District chhunga Bank hotute bakah tlawmngai pawl hruaitute an tel a ni.
