Inrinni zing a ruah leh rial thawk khan Khawzawl District chhunga khaw pahnih – Tualpui leh Vankal ah te chenna in chung engemawzat a deng chhia a. Tualpui khuaah hian in 24 vel leh Vankalah in 27 vela rial hian a deng chhia nia hriat a ni.He chhiatna thleng hi a hriat velah Khawzawl Bawrhsap Pu K. Lalrohlua chuan chhiat tawk te chhawmdawl dan tur a ngaihtuah nghal a.
Nizan khan Tualpui khuaah Pu Elijah LH Sanga, SDC chu tir nghalin chhiat tawk te chhawmdawl lailawk (immediate relief) atan Silpauline sem chhuah nghal a ni a. Tin, tukin Pathianni tuk khan chhiat tawk te tanpui tur hian Vankal an pan leh a, chhiat tawk te hnenah Silpauline an pe leh nghal bawk a ni. Tualpui leh Vankal khuaa chenna in chung chhia tam tak hi Village Level Disaster Management Committee kaihhruainaa thawmthat nghal a ni.
Khawzawl Bawrhsap Pu K. Lalrohlua chuan Rial tlain in chung a tih chhiat te hi verification report milin State Disaster Response Fund (SDRF) atangin tunkarah tanpuina pek nghal tum a nih thu a sawi a. Tanpuina pawisa hi Village Level Disaster Management Committee te Bank Account-ah dah luh a ni dawn tih a tarlang. Tualpui leh Vankal khawtlang hruaitute hian Sorkarin an harsatna tawh te hriatpuia hma a la nghal zung zung chu lawmawm an tih thu lo sawiin, sorkar lakah an thlamuan thu a hmun a endiktute bulah an lo sawi a ni.
