Election Commission of India (ECI) chuan vote nei zawng zawng ten vote an thlak theih nan hma nasa takin a la a. Nikum 2023 MLA Inthlanpui atang khan kum upa leh vohbik ten vote an thlak theih nan ruahmanna thar Home voting a rawn tichhuak a, hei hi kumin Lok Sabha Inthlanpuiah pawh chhunzawm a ni. Khawzawl District-ah pawh Home Voting hi April ni 8 leh ni 9 khan kalpui a ni a. He hunah hian Home Voting diltu mi 109 atangin mi 107 in vote an thlak a, vote thlak lo pahnih la awm te hi pakhat damlohna avanga hmun hla zawka refer a ni a, pakhat hi thihna vanga zin bo a ni.
Zin bo hi an khua Tualte ah a lo haw leh tak avangin vawiin (14.04.2024) khan Home Voting Nodal officer Pu Vabeimozachhi SDO(S), Khawzawl hovin a chenna Tualte khuaah vote thlak turin an va kal chilh ta a ni. Khawzawl Bawrhsap Pu K. Lalrohlua chuan Election Commission of India in voter zawng zawng huapzoa inthlan kalpui tumin ‘No Voter to be left behind’ tih thupuiah a nei mek tih a sawi a. He thupui bawhzui hian Khawzawl District-a Lok Sabha Inthlanpui buaipuitute chuan vote nei zawng zawngin vote an thlak theih nan tan an lak thu pawh a tarlang a ni.
Bawrhsap hian April ni 19, 2024 a MP Inthlan lo awm turah hian vote nei zawng zawng te chu vote thlak theuh turin a sawm tih a sawi bawk. Vawiina vote thlak ta chhiar tel hian Khawzawl District, 22-Tuichang AS ah hian Home Voting dil mi 109 atanga mi 108 in vote an thlak thei ta a ni.
