Tukin khan Khawzawl Bawrhsap Pu K. Lalrohlua chuan Sapsakei Lamlian laih mek avanga NH-06 leivungin a hnawh dan a hmunah a enfiah a. He hunah hian Khawzawl SP Pu Lalchhuanthanga leh Khawzawl Vengthar khawtlang hruaitute pawh an tel a ni. Bawrhsap hian chawhma dar 10:00 khan NHIDCL leh kawngpui enkawltu Company – Shri Balaji Construction Company (SBCC) aiawh te a ko leh a. SBCC ah hian thutlukna siam thei he laiah an awm loh avangin, Executive Director, NHIDCL hnenah a tul anga hma rawn la turin lehkha a ziak nghal. Bawrhsap hmalaknain Company lam hian he laia hnathawk turin JCB pakhat an rawn tir a, hna a tan nghal a ni.
Amaherawhchu, Bawrhsap hian kawng siam a, leivung paih fai bawk tur chuan Hitachi 2 leh JCB 1 a ngaih thu NHIDCL leh Contractor te hi a hrilh a ni. Khawzawl Bawrhsap Pu K. Lalrohlua chuan kawng siam leh leivung tih fai a nih chhungin khawchhak lam atanga Aizawl pan tur leh Champhai lam pan tur lirtheite chu Khawzawl khawchhungah an tlan luh a ngaih dawn avangin lirthei kal velin harsatna an tawh loh nan signage siam turin Khawzawl SP a hrilh nghal a. Bawrhsap hian he lai kawng paltlangtu mipuite hriatthiamna a ngen bawk a ni.
Sapsakei Lamlian (Loch Road) hi Mizoram khawchhak lama lamlian upa ber a ni a. Aizawl khawpui duangtu British Army Officer Captain Loch-a’n Aizawl- Tuisenhnar (Khawzawl)- Champhai- Falam (Myanmar) inkal pawhna tura a lo siam a ni. Khawzawl Vengthar atanga kawng kal hi NH-06 an laihna lamah Contractor te hian an tichhia a. Kum hnih liamta atang khan siam tha tura vawi tam ngen an nih hnuah pawh chhuanlam eng eng emaw an nei zel a, Khawzawl Vengthar khawtlangin he kawng siam hnatlang hi an nei ta a ni.
