National Programme on Climate Change and Human Health (NPCCHH) hnuaia State Nodal Officer Dr. Vanlalrengpuia Chinzah chuan, tunlai khawlum vangin natna hrang hrang a thleng thei mekah, heng natna lakah hian mipui an him theih nan leh hriselna vawn theih nan tui thianghlim vawt lutuk lo in tam a pawimawh tih a sawi. Akashvani zawhna chhangin Dr. Vanlalrengpuia chuan khawlum zual zel karah sawrkar laipuiin khawlum laka invenna tur hrang hrangah mipuite chu thurawn a pe tih sawiin, chhun dar 12 leh chawhnu dar 3 inkarah ni sa hnuaia chhuah tam loh a tha a, chawhnu lam khaw lum zual laiin pawn lama hna hahthlak thawh loh a pawimawh a, pawn lama hna thawk thinte pawh ni sa chu a lawnga do lo tur leh, an hnathawhna hmunah a theih ang anga daihlim siam tur in a chah a, kum upa leh natna neite chu a theih chuan ni tin an hriselna dinhmun enfiahsak a tha tih a sawi bawk.
Health Department sawi dan chuan, khaw lum zel vang hian – khaw lum bawl, kut, ke leh kerek vung, tha chat, thidang leh kaih te tawrh theih a ni a, heng bakah hian khawvel lum zel vangin sikserh (malaria), kawtha lo, thawhah leh vun cancer te pawh pung zel thei a ni an ti a, hengte avang hian mipuiin zirtirna tha an dawn a pawimawh tih sawiin, mipui te chuan inven chu tih dam aiin a tha zawk tih an vawn reng a pawimawh an ti.
NPCCHH Consultant Pi Rosie Zosangkimi chuan March, April leh May thla te chu India Meteriological Department (IMD) in khaw lum chhoh hunlai tia a vuah a ni tih a sawi a, India ram hmun dangte angin hmar chhak chuan khaw lum hi tuar na lutuk lo mah se Mizoram pawh a tuam ve mek tho, a ti. NPCCHH hi sawrkai laipuia Ministry of Health and Family Welfare department chuan National Health Mission hnuaiah kum 2019 February thla khan a rawn din tan a ni a. A thil tum tlangpui te chu sik leh sa inthlak danglam nasa leh dan pangngai pel a khawchin lo danglam thin, heng khawlum lutuk te, khaw vawt lutuk te, cyclone te, lirnghing te, tuilian leh a dangte avanga thihna, natna, inhliam palh leh rilru lam leh hriselna dangte thleng a nghawng thei te tih tlem a tihzia awm a ni.
