Mizoram Oil Tanker Driver Association (MOTDA) leh Petroleum Entrepreneurs’ Transport Union of Mizoram (PETUM) te chuan Kawngpui chhia avanga lirtheite tana chetsual hlauhawm an tih avangin nimin atang khan pawl pahnih hnuaia lirtheite an tlan lo. MOTDA leh PETUM hruaitute chuan kar kalta inrinni khan Aijal Club ah Jt meeting an nei a, hemi tuma an rel danin, Mizorama Kawngpui, a bikin Kawnpui leh Sairang inkar Kawngpui chu Tuialhthei phur lirtheite tan chetsual hlauhawm khawpin a chhe mek a. Kawng chhia a tlan hian Petrol leh Diesel baw palh in chhiatna nasa tak a thlen theih avangin vawiin atang khan Tuialhthei phur te chu tlan rihloh nise, an tih angin Mizoram a lo lut tur lirtheite pawh tlan lui lo turin an ngen a, hei hian lirthei dangte a huam loh thu an sawi. Nimin khan PWD Minister Pu Vanlalhlana pisaah Mizoram Truck Owners Association (MTOA) leh Mizoram Truck Drivers Association (MTDA) hruaitute an inkawm a. Deputy Speaker leh Kolasib bialtu ni bawk Pu Lalfamkima chuan a telpui a ni.
He hunah hian MTOA leh MTDA ten Kawnpui-Khamrang kawng chhia avanga harsatna an tawh te sawiin, tun aia chak zawka kawng siam a nih theih dan te an sawi a. A bul tan nan vawiin hian Minister hovin MTOA leh MTDA hruaitute nen a hmun ngeia enfiah an rel nghal a ni. Hetihlai hian, Kolasib CMO hmalaknain Kawnpui leh Sairang inkar- Tuitun leh Khamrang khaw inkara Kawng chhia avanga lirthei tangkhang mek khalhtu te zun leh ek thiarna hmun leh an hriselna dinhmun endik sak an ni. Lirthei khalhtute hriselna dinhmun an endikna ah hian damlo enkawl ngai leh damdawi pek ngai hmuh a ni lova, Malaria laka an him nan thosilen a thlawnin pek anni. Medical staff te hian Driver te inthiar dan te zawt fiah in,natna inkai darhna kawngah harsatna a thlen loh nan, lei lai khuar ah inthiar in, lei in vur leh zel tura hriattir anni a. Medical staff te hian hriselna kawngah zirtirna an pe nghal bawk.
Driver tangkhangte dinhmun enfiahna ah hian Kolasib CMO office atangin Health Supervisor pahnih leh Health Worker pathum an kal a ni. Supply Department chuan Mizoram chak lakna kawngpui chhia avanga mipui mamawh hrang hrang phurhluh khaihlak deuh mahse mipuite chiai lo turin an ngen a ni. Food, Civil Supplies & Consumer Affairs department Director chuan nimin khan thuchhuah siamin, rokhawlhna avanga Oil phurh luh a khaihlak chhungin mipuite chiai lo turin a ngen a, PWD ten theihtawp chhuahin kawng siam that hna an thawh mek thu leh siam that thuai beisei a nih thu a sawi a, Petrol Pump ten Oil pek chhuah dan tur thupek awm sa an zawm that zel a tul thu leh lirthei a thun bak chu bur hmanga pe chhuak lo turin a ngen nawn a, mipuite pawhin harsatna hrethiam a, mahni lirthei a thun theih bak la khawm lo turin a ngen bawk a ni.
