Shillong, Nailur : U Lat ka jylla Meghalaya, CH Vijayashankar ula ong ba ka Swasth Nari Sashakt Parivar
Abhiyaan ka dei ka sienjam ba kongsan ban pynkhlain ia ka koit ka khiah jong ki longkmie, ka jingpynkup bor ia ki longiing bad ka jingtei ia ka ri kaba kham biang ha ka koit ka khiah.
Haba ai jingkren ha ka Health Camp ba kyrpang ha Barapani State Dispensary, Ri Bhoi District mynta ka sngi, u Lat ula ong, “Ka Swasth Nari Sashakt Parivar Abhiyaan ba la plie paidbah da u Myntri Rangbahduh ka ri ha ka 17 tarik Nailur 2025, ka dei ka sienjam ba kongsan ban pynkhlain ia ka koit ka khiah jong ki longkmie, ka jingpynkup bor ia ki longiing bad ka jingtei ia ka ri kaba kham biang ha ka koit ka khiah.”
U Lat ula pynpaw kane ka prokram kam sahkut tang ka jingai jingsumar, namar ka thmu ban pynkup bor ïa ki kynthei ha ka shnong ka thaw ban pynthikna ba ki jingshakri ha ka koit ka khiah kin poi da kaba suk sha ki kmie, ki khynnah bad ki samla pule.
Ha ka jingleit jngoh, u Lat ula ïakren bad ki nongïoh jingmyntoi bad sam ïa ki song jingbam sha ki longkmie ba armet bad ïa ki sanitary pad sha ki khynnah kynthei kiba dang khie samla, da kaba pynpaw ïa ka jingdonkam ka jingbam tei met bad ka jinglehkhuid na ka bynta ki khynnah kynthei kiba dang khie samla. U la pynshlur ia ki kmie ban shim ia ki lad jingsumar na ka bynta jong ki bad ki khunlung jong ki, da kaba ong, “ka koit ka khiah jong ki kmie bad ki khun ka long kum ka nongrim na ka bynta ka imlang sahlang kaba kiew shaphrang”.
U Lat u la leit jngoh ïa ki basa ba la buh da ki tnad Tuberculosis (TB), Non-Communicable Diseases (NCD) bad kiwei ki tnad kiba trei ha ki kam ba ia dei bad ka koit ka khiah bad pynpaw ka jingsngewnguh na ka bynta ki sienjam ai jingiada ba la shim da ki kynhun ai jingsumar.
Haba pynpaw ïa ka jingsngewkhia halor ka jingjur jong ka jingpang Cancer bad Tuberculosis ha Meghalaya, u la kyntu ïa ki heh jong ka tnad ka koit ka khiah, ki nongialam shnong, bad ki paidbah
ban ïasnohkti lang ban ïakhun ïa kine ki jingeh.
Shuh shuh ula bthah ïa u Deputy Commissioner bad ki heh jong ka tnad ka Koit ka Khiah ba kin pynthikna ba ki jingmyntoi jong ka Abhiyaan kin poi sha ki paidbah ha kylleng ka district.
Ha ka jingkren u Lat ula ong, ba ka jingjop jong ka Swasth Nari Sashakt Parivar Abhiyaan ka shong ha ka jingïashim bynta lang bad ka sorkar, ka imlang sahlang, bad ki longïing ki ïatreilang na ka bynta ka jylla Meghalaya kaba koit ba khiah.
U Lat u la ïaroh ïa ka jingtrei shitom jong ki bor pynïaid District, ka tnad ka Koit ka Khiah, ki doktor, ki nurse, ki nongtrei ASHA bad ki nongtrei ba ai jingshakri na ka bynta ka jingaiti lut jong ki ban wanrah ïa ka jingsumar ba bha bad ka jingpynshai sha ki paidbah. U la pynpaw da ka jinshimkhia ki nongtrei, ki jingthmu jong ka Abhiyaan kin urlong ha ka Jylla.
