Aizawl District Transport Office hnuaia enforcement staff-te chuan January thla chhung khan lirthei dan bawhchhia mi 185 an man a, an hremna sum chawitir zat tlingkhawm chu Rs. nuai 7 dawn a tling. Enforcement staff-te hian January thla chhung khan lirthei chi hrang hrang 725 an endik a, he’ng zinga 185 hian dan bawhchhiain, danin a phut angin hrem an ni a, hremna sum chawi tlingkhawm hi Rs.
nuai 6, sing 8 leh sang 6 a ni. Lirthei dan bawhchhe zingah bungraw phur lirthei (light goods vehicle) an tam ber a, 53 niin, passenger phur maxi cab 41 an awm. Bungraw phur lirthei lian chi 23 leh mimal lirthei – LMV 34 an awm a; ke pahnih nei chi 14 bakah lei laihna 7 a tel bawk. Lirthei chi dang erawh tam tham an ni lo. Lirthei an man zinga a tam ber hi chhiah chawi tur ang pe lo, insurance thi tawh leh leh vehicle fitnessa tling lo te a ni.
Lirthei dan bawhchhia, tlan tlang emaw a hmuna chawi nghal thei lo, e-challan hmanga an registration an tihtawp sak lailawk 11 an awm bawk a. Heng ho hremna atana sum chawi tur hi a vaiin cheng nuai 12, sing 2, sang 5 leh 500 a ni. Lirthei dan bawhchhia hremnaa sum chawi tir hi a vaiin sorkar sum bawmah chhun luh thin a ni. Aizawl DTO hotute chuan kum tling lo lirthei khalh tir lo turin lirthei neitute an ngen thar a, a khalh tirtu leh a khalhtu chu hremna thuhmun reng a ni tih an sawi a. Tun thla hi Road Safety Month-a hman mek a ni tih mipui an hriattir thar bawk.
