Mizoramah Jail tang mi 1,782 an awm a, lungin thenkhatah tang awm thei tur zat bituk ai a tam an awm mek thu Prison Department hotute chuan an sawi. Prison Department chhinchiah danin vawiin thleng khan Central Jail mipa ward ah tang 844 an awm mek a. Central Women Jail ah tang mi 165 an awm mek bawk.
Aizawl District Jail ah tang mi 110 an awm mek a, Lunglei Dist Jail ah mi 153, Siaha Dist Jail-ah tang 78, Champhai District Jail ah 162, Kolasib District Jail ah mi 114 an tang mek a, Lawngtlai District Jail ah tang 27, Serchhip District ah jail tang 53 leh Mamit District ah tang 76 an awm mek in, vawiin thlenga Mizorama jail tang belh khawm hi 1,782 a ni. He’ng lungin tang belh khawm zing ah hian kum tling lo tang mi 18 awmin, hmeichhia mi 218 tang an awm mek bawk a, a bak mi 1,546 te hi mipa an ni.
Tun dinhmunah hian Mizoram tanina tang awm thei tur bituk ai a tam tang an awm mek a. Central Jail Aizawl ah tang mi 438 awm thei tura ruahmanah jail a leta tam mi 844 tang an awm mek a, hmeichhe awmna Central Women Jail a tang dah theih zat hi mi 96 a nih laiin tun dinhmunah mi 164 tang an awm mek thung. Aizawl District Jail-ah mi 90 awm theihna -ah tang 112 an awm mek a. Mi 109 awmna tura ruahman Lunglei District jail-ah mi 156 an tang mek bawk. Tang 105 awmna tura ruahman Champhai district jail-ah mi 160 an tang mek a. Jail thenkhat a tawt viau laiin Siaha, Kolasib, Lawngtlai, Serchhip leh Mamit district Jail ah te chuan tang thei tur zat bithliah aia tlem jail tang an awm ve thung a ni.
