Vawiin khan Pu P.C. Vanlalruata, Minister, Irrigation & Water Resources Department (IWRD), etc. chuan IWRD Auditorium, MINECO-ah khawvel puma lui humhalh ni atana hman, International Day of Action for Rivers vawi 29-na puala hun buatsaih chu khuallian niin a hmanpui a. Er. H. Ginzalala, Adviser to CM (Technical) chu khualzahawm a ni bawk. Kumin thupui chu ‘Protect Rivers, Protect People’ (Kan dam khawchhuah nan lui humhalh rawh) tih a ni.
Khuallian Pu P.C. Vanlalruata chuan tui pawimawhzia leh lui tui humhalh that lohvin mipuite a nghawng nasat turzia sawiin, Mizoramah lui tui fim a awm avangin Mizo mipuite an vannei, a ti a. Hetih lai hian lui lian tha a awm loh avangin tui hna siamtu lui te zawkte humhalh a ngaih thu a sawi a. Lui tui chu nunna hnar a ni a, humhalh a nih loh chuan thangthar lo awm zel turte’n tui in tur an nei dawn lo tih a sawi.
Minister chuan sawrkarin lui humhalh nan hma a la mek tih sawiin, Mizo lo neih dan, tlang ram lo neih (shifting cultivation) aia hrisel leh chhehvel tichhe lo zawka loneitute’n lo an neih theih nan sawrkar chuan tung cultivation leh permanent farming a kalpui chho mek tih a sawi a. Vawiin, International Day of Action for Rivers chu ram luite humhalh an nih a, hmangaih leh duat taka enkawl an nih theih nan a tangkai dawn a ni tiin, kalkhawmte chu veina nen hma la a, midangte zirtir zel turin a chah a ni.
Khualzahawm Er.H. Ginzalal pawhın thu sawiin, lui leh luia cheng nungchate humhalh tur chuan lui tibawlhhlawhtu lian berte zinga mi, plastic waste dang bet tur trapping system siam a, plastic waste sawngbawlna lama tui tura mipuite chawhphur an ngai a ni, a ti a. Shifting cultivation tihtlem a, a theih phei chuan tihtawp a, permanent farming nasa zawka kalpui a pawimawh tih a sawi bawk a. Ngialnghet zawk leh chhehvel tichereu lo zawnga economic link road laih dan tur inkaihhruaina felfai tak kan neih a ngai bawk a ni, a ti a. Lui tui humhalh tur chuan mipui, NGO, VC leh sawrkar bakah department hrang hrangte tanrual a, thawhho that a ngaih thu a sawi bawk a ni.
