Ramchhung hmun dangte rualin tukin khan Hawla Indoor Stadium-ah International Day of Yoga vawi 10-na chu Yoga for self and society tih thupui hmangin a hohova hman a ni. He hun hi Governor Dr Hari Babu Kambhampati chuan Khuallian niin a hmanpui a. Larsap chuan India ram atanga Yoga rawn pianchhuah dan sawiin tunah chuan khawvel pumpuiah mi tam takin Yoga chu tuipui mekin nitin an taksa sawizawina an hman thin thu a sawi a. Yoga hmanga taksa insawizawi chu hriselna a nih bakah ram leh khawtlang hrisel zawk siam an tumna kawngah hmalakna pawimawh a nih thu sawiin Mizoramah Yoga tuipui tute an pung zel chu lawmawm a tih thu a sawi a, Mizoram hmelhmang mawi tak leh boruak thianghlim tak chu Yoga hmanga insawizawina atan hmun duhthusam a ni tiin Yoga thatna leh tangkaina mi tamzawk ten an lo hriat pawh theih turin Directorate of Ayush a thawk te pawh tan la zel turin a fuih a ni.
Thusawitu dang Chief Secretary Dr Renu Sharma chuan taksa leh rilru hriselna ngaihpawimawh chu mi tin ten an thlahthlam tur a ni lo a ti a, hriselna atan mahni tih theih awlsam tak leh hautak lo, khawi hmunah pawh tih theih chu Yoga hmanga insawizawina hi a ni a ti bawk.He Yoga Protocol-ah hian Ministry of AYUSH atanga yoga instructor chuan hma hruaiin kalkhawmtute chu yoga hmanga insawizawina a neih pui a. He hunah hian Yoga tuipuitute bakah hian NER Directorate leh Group HQ Silchar kaihhruaina Mizo Bn 1, Mizo Air SQN 1 leh Mizo Bn NCC 20-a NCC cadet-te bakah an Commanding Officer leh Instructor-te pawh an tel a ni.
Report a tarlan dan chuan AYUSH Directorate hnuaiah hian Yoga Instructor 12 an awm mek a, chungte chu District Hospital 8 (Pariat)-ah te, Civil Hospital Aizawl-ah te, Integrated AYUSH Hospital Thenzawl-ah te, Administrative Training Institute (ATI)-ah te dah an ni. International Day of Yoga pual hian District hrang hrang leh zirna in bakah Assam Rifles ten hun an hmang a ni.
