Vawiin hi khawvel pumah “Hmeichhiate Ni” hman a ni a, Mizoramah hmun hrang hrangah hemi ni pual hian programme buatsaih a ni a, a lawmna pui ber chu Women &Child Development (WCD) Department, State Legal Services Committee leh International Women’s Day Organising Committee te hma lakna in Vanapa Hall-ah buatsaih a ni. International Women’s Day pual hian, kum tina an lo tih thin angin, Ministry of Women& Child Development, Govt of Indian kaihhruaina siam zulzuiin,kar khat chhung, March ni 1 atang khan ni tin lawmna hun buaitsaih a ni.
Hmeichhiate Ni hmanna-ah hian Social Welfare &Tribal Affairs,Women and Child Development Minister, Pi Lalrinpuii chuan thusawiin, hmeichhiate thawh hlawkzia sawiin, Mizo hmeichhiate paw’n hma an sawn zel thu a sawi. Pi Lalrinpuii chuan hmeichhiate chu an thlen china lungawi mai loin, kohhran leh khawtlangah te theih tawpa thawk zel turin a fuih. Hma sawnnaa hmeichhiate din hmun pawimawhzia sawiin mawh phurtute zinga hmasa ber chu nute an nih thu a sawi bawk.
Champhai district-a District Hub for Empowerment of women, District programme office Women & child development buatsaihin vawiin khan Hmeichhiate Ni pualin Govt’ Champhai College Multipurpose Hall ah hun hman a ni a. He hunah hian hmeichhiate’n inchhungkhura hleihlenna an tawrh thin tih tlem dan tur leh mipa leh hmeichhe intluktlanna chungchang zirho a ni a, hun hmang tute chuan India danpuiin hmeichhiate chanvo leh an nihna a humhim dan te, an mawhphurhna leh an pawimawhnate hriat chian a ngaih thu an sawi.
Kolasib-ah pawh NABARD Kolasib District bul tumin “Invest in women: Accelerate progress” tih thupui hmangin VC House, Thingdawl, Kolasib District-ah hman a ni. Thingdawl RD Block-a Block Developement Officer (BDO) Pi F. Lalnisai chuan Khuallian niin a hmanpui.
Lawngtlai-ah chuan P&E Veng YMA Hall-ah District Hub for Empowerment of Women (DHEW) leh District Legal Services Authority te tangkawp buatsaihin Hmeichhiate Ni hman a ni a, hun hmanpuitu Pu Abraham Beirazi Khithie, Addl. DC chuan hmeichhiate chuan an hlutna an hriat a pawimawh thu sawiin hmeichhe rintlak awmna chhungkua chu chungkaw hlawhtling an nih fo thu a sawi.
Serchhip-ah chuan P&E Veng YMA Hall-ah District Hub for Empowerment of Women (DHEW) leh District Legal Services Authority te tangkawpin buatsaih a ni a. He hunah hian Pi VL Remruatpuii, Gender Specialist, DHEW chuan kalkhawmte hnenah Beti Bachao Beti Padhao (BBBP) chungchang a thara inhrilhhriat lehna hun a hmang.
Mamit ah pawh Hmeichhiate Ni hi I&PR Conference Hall, Mamit-ah District Hub for Empowerment of Women, Women & Child Development buatsaihin hman a ni a, Pi Lalthangpuii Pulamte, SP Mamit chu khuallian a ni. Pi Lalthangpuii Pulamte, SP Mamit chuan hmeichhiate pawimawhna leh hlutna piah lamah Pathian thuin min zirtir angin hmeichhe lu chu mipa an nih avangin mipate an pawimawhzia a sawi a. Tumah hi in diriam a in ngainep tur an awm lova. Inring tawn theuh kan nih avangin hmeichhia leh mipate hian hmasawnna rahbi sial turin mawhphurhna tam tak an nei a ni a ti.
