Vawiin khan School Education Directorate Conference hall-ah International Literacy Day pualin hun hman a ni a, Pu T.Lalhlimpuia MLA-in khuallian niin he hun hi a hmanpui. International Literacy Day hi September 8, Pathianni a nih avangin a puala hun hman theih ni hmasa berah hman a ni. Khuallian Pu T. Lalhlimpuia chuan he hunah hian thusawiin Literacy chu tunlai khawvelah a pawimawhna a lian zel a, lehkha ziak leh chhiar chauh ni lovin Computer-a application hrang hrang hrethiam leh hmang thei nih a pawimawh chho zel a ni a ti a. Adult Education-in skill training chi hrang hrang a buaipui chu a tangkai tih sawiin theih tawp chhuah zel a tul thu a sawi a. Ziak leh chhiar hnufumna hmun chu hmun hla leh kirkhawr a ni deuh zel tih sawiin, heng hmunah te hian kohhran missionary-te an awm thin a, kan missionary-te hmang tangkai zawnga hmalak te pawh a tul hle a ni a ti. Pu T. Lalhlimpuia chuan Zosapte avangin A Aw B kan nei a, ziak leh chhiar kan thiam phah a, hma kan sawn chho zel a, Pathianin Zofate min hruaina a ropui tih sawiin hmasawn zel turin department-in ruahmanna a siam te thawhpuiah tlawmngai pawl hrang hrangte sawm ila, hmasawnna hmuh tur a awm zel ang tih a beisei thu a sawi bawk.
Prof Lalbiakdiki Hnamte Education Reforms Committee working chairman pawhin an hmalak dan tlangpui sawiin, an hmalak meknaah hnawk chinfel tur a awm nual tih a sawi a. Zirnaah mahni tawng hlutna sawiin mahni tawnga kan hriatthiam tluk hi a awm thei lo a ni a ti. Mizo tawng hlutna sawiin kan tawng hi a boral chuan kan hnam pawh a boral ang a ti a, tawng humhalh a tul thu a sawi. Pi Caroline Rinthanpuii Fanai Dy State Project Director Samagra Shiksha pawhin ULLAS hmalakna chungchang a sawi a, ziak leh chhiar thiam lo zirlai 1692 an awm thu leh Ministry lamin min beisei angin zaah za ziak leh chhiar thiam nih tumin hma lak mek a ni a ti bawk.
Pu T. Lalremsiama, Asst. Director Adult Education chuan he ni hman dan sawiin kum 1966-a UNESCO General Conference chuan International Literacy Day chu kumtina hman turin a rel a, Mizoramah chuan kum 1976 atangin hman thin a ni a ti a. kum 2018-a chhut dan chuan Mizorama ziak leh chhiar thiam awm zat hi zaa 96 kan ni a, kawng hrang hrangin hma lak chhoh zel a ni a, zaah za kan nih theih thuai beisei a ni a ti. Adult Education-te hmalakna atanga zir hlawhtlingten an hlawhtlin dan an sawi bawk.
