Chief Minister Pu Lalduhoma’n sawrkar laipui atanga insak tanpuina dawngtu tur te Account tih danglam emaw thlak emaw a awm anih chuan a tul anga action lak ani dawn a ti. He thu hi nimina Assembly thutkhawm zawhna leh chhanna huna RD Department chungchang an sawina ah sawiin Pu Lalduhoma chuan tun dinhmunah insak tanpuina first instalment dawng si second instalment hmu theilo chungchangah harsatna tamtak a awm tih sawiin tun dinhmunah chinfel nghal harsa tak a ni a ti a, siamfel ngai leh diklo te chiangkuang tak a awm chuan action lak ani dawn tih a sawi.
Chief Minister chuan insak tanpuina dawng tur te chu Congress hunlaia an thlan ani tih sawiin heng zingah hian thi leh pem te an awm a ti a, heng an awm chuan District tinah an aiawh thlan leh thin a ni a, PMAY Scheme hrim hrim chu zopa rilru nen inmil lo tak ani tih sawiin in sakin sak zawh nghal theih a ni silo a, second instalment a kal muang leh si nen an nghah laiin thenkhatin anlo sa zo thin a, a sa zo ten an dawn nawn phal ani thin bawk si lo a, hei hi Department in uluk takin a enfiah dawn a ti. Rural Development Minister Prof Lalnilawma chuan PMAY-G Rural kaltlangin Mizoramah chhungkua 24,300 in PMAY-G tanpuina instalment an dawng tawh a, tanpuina dawng zel thei tur an chhinchhiah zat chu chhungkaw 29,967 a ni a ti a, PMAY-Urban ah chhungkua 36,536 in instalment an dawng tawh a ti a, tanpuina dawng thei tur MIS-a attached zat chu beneficiary 37,244 an ni a ti bawk.
Minister chuan heng pawisa dawng zo lo ten an dawn theih nan Finance ah an dil tih sawiin, nimin khan cheng vbch 42 ah an release a, an zawh chin chu 15,975 an ni a, January thla leh tuna inthlauhna chu 7722 a ni a ti. RD Minister chuan hmabak 14019 a awm tih sawiin instalment hmasa dawng tawh te atangin completion record a awmloh chuan an report a chhia a ti a, sawrkar laipuiah chak taka bawhzui ani tih sawiin hmabak cheng vbch 114.47 ani tih a sawi bawk.
