Nimin khan Shillong, Meghalaya-ah ‘India Japan Intellectual Conclave’ neih a ni a, Mizoram LESDE Minister Pu Lalnghinglova Hmar chu he hunah hian telin thu a sawi. He Conclave thupui chu – ‘North East India, Bangladesh and the Bay of Bengal in the Indo-Pacific: The Way Forward’ tih a ni a. He hunah hian MP leh Minister hrang hrangte bakah India, Japan leh Bangladesh atangin Ambassador, High Commissioner leh company-a mi pawimawhte an tel a; India, Japan leh Bangladesh insumdawn tawnna lam hawi sawiho a ni a, Ministry of External Affairs, Embassy of Japan leh North Eastern Council buatsaih a ni.
He hunah hian thu sawiin Pu Lalnghinglova Hmar chuan mithiamte thusawina zawng zawngah India, Japan leh Bangladesh insumdawn tawnna a len tur thu leh chumi kawngah chuan India Hmarchhak state-te an pawimawh thu a sawi a. Mizoram pawimawhna pawh sawiin, he insumdawn tawnna lian takah hian Mizoram hian tel ve a duh mai ni lovin hmun pawimawh tak chan a duh a ti. Hetih lai hian kan tlin tawk a la sang lo a ni mai thei a, nimahsela sorkar thar lo piang hian hemi kawnga hmalakna awmte chhunzawm a, a hma aia chak zawka kalpui a tum a ni a ti.
LESDE Minister chuan Mizo ṭhalaite Japan-a hnathawk tura an kal chhuak mêk thu leh, Mizoram sorkarin hei hi lian thama kalpui an tum mek thu a sawi a. Hemi kawnga thawhpui turin sorkar laipui aiawh te, state sorkar aiawhte leh company hrang hrang hotute a sawm nghal bawk a ni. He Conclave-ah hian khawvel insumdawn tawnna kawnga India-in khawchhak lam hawi a tum dan te, Japan-in investment lian tham a kalpui dan te, India Hmarchhak state-te pawh he hmasawnnaah hian an tel thu te sawilan a ni a, thawhho zel dan tur leh inpuih rawn dante zirho a ni.
