Vawiin khan Aijal Club, Aizawlah Information & Communication Technology (ICT) Department leh National e-Governance Division (NeGD), MeitY, Govt. of India-te buatsaihin nikhat awh ‘Awareness and Sensitization Workshop on User Experience & Design System’ neih a ni a. ICT Minister Dr. Vanlalthlana chuan khuallian niin he hun hi a hmanpui a ni. Khuallian Dr. Vanlalthlana chuan NeGD, MeitY, atanga lokal mithiamte leh ICT Department-a thawktute’n workshop an buatsaih chu lawmawm a tih thu sawiin, department hrang hrang atanga official tel zawng zawngte’n an hlawkpui ngei a beisei thu a sawi a. Tunlai khawvelah website emaw, apps mipuite’n awlsam taka hman theih an mamawh tawh thu sawiin, hemi atana user interface/user experience (UI/UX) pawimawh dante a tarlang a. Technology-in min khalh kal nasat tawh avangin, tuna website kan neih laite pawh mipuite tana a tangkai thei ang ber turin enkawl zui a tul thu a sawi bawk. ICT Minister chuan information mamawh en nan Sawrkar website hrang hrangte a tlawh kual nasat thin thu sawiin, sawrkar website update lo, information pawimawh pawh dah mumallo leh enkawl tha tawklo an awm nual thu a tarlang a; kan website leh apps-te hi mipuite hman tangkai tur a nih avangin tan kan lak a ngai a ni, a ti a. ICT Minister a nihna ang pawhin official kalkhawmte hnenah ngenna siamin, website homepage mai nilo, a chhung thu leh information pawimawh update kawngah theihtawp chhuah thar a tul thu a sawi a.
Department information pawimawhte, dan leh hrai (Act & Rules) kaihhnawihte leh notification/orders awm ang angte website-ah regular taka update-a mipui tana information pawimawh dahkhawmna hmun tha tak nei theuh turin a chah bawk a. Information technology kaltlangin inrelbawlna tha zawk (better governance) kan thlen thei a ni tih sawiin, sawrkar website leh apps kan enkawlna kawngah UI/UX kan ngaihpawimawh a, kan tangkaipui a tul takzet thu a sawi a. Hlawk taka hun hmang theuh turin duhsakna a hlan a ni. He hunah hian Dr. Lalthlamuana, Chief Informatics Officer, ICT Department chuan kalkhawmte lawmna thu sawiin, he nikhat awh ‘Awareness and Sensitization Workshop on User Experience & Design System’ chu kalkhawmte’n an hlawkpui ngei a beisei thu a sawi a, a bikin online services leh mobile applications hmang tangkai mek leh la hmang tangkai tur department-te tan phei chuan a pawimawh lehzual thu a sawi a ni.
He workshop hi thupui panga (5) ah then niin, Mizoram Sawrkar hnuaia department hrang hrang leh a hmang tangkai thei tur Mizoram chhunga Central Sawrkar Office-ten workshop chhimtu tur aiawh thahnem tak an tir a ni. He hunah hian MeitY, NeGD atanga lokal Resource person Pu Aditya P.Singh, UX Designer, NeGD, Pu Ajeet Kumar, Deputy General Manager NeGD leh Pi Neeta Tandon, SC, NeGD te’n zirtirna an pe a; kalkhawm te’n zawhna leh chhanna hun hlawk thlak tak an hmang a ni. He workshop programme tawpah hian Dr. Lalthlamuana, Chief Informatics Officer, ICT Department chuan participants zawng zawngte hnenah Certificate hlanna neiin, workshop chhimtu department hrang hrang atanga official kalkhawmte, NeGD offcial leh ICT department-a thawktu he hun hlawhtlin theih nana buaipuitu zawng zawngte chungah lawmthu sawiin hun a khar a ni.
