District Level Road Safety Committee-te chuan vawiin chawhnu dar 3:00 khan DC Mini Conference Hall-ah a Chairman Pu VL Hruaizela Khiangte hovin an thukhawm. District Bawrhsap Pu VL Hruaizela Khiangte chuan vawiin meeting chu lirthei chetsualna tihtlem dan tur ngaituahho tura koh a nih thu a tarlang a, fimkhur taka lirthei khalh tura inzirtir chu sawrkar mawhphurhna chauh a nilova, chhungkua leh khawtlang-ah traffic rules inhrilhhriatthar a pawimawh a, Dan leh Dun awm sa te tha taka zawm a nih theih nan khauh zawka dan kenkawh a tul, a ti. Lirthei chetsualna tam tak chu lirthei khalhtu thenkhat fimkhur tawk loh thin vàng a ni a, A dahna tur nilova lirthei dah mai thin te, dropping zone niloa passenger ‘pick and drop’ mai thin te, chak taka tlan te, mahni side niloa tlan te bakah signal light hrethiam lo te, helmet khum lo a tlan mai te leh document felfai lo tam tak an la awm chu hmalak a tul hle, a ti a, lirthei khalhtute an fimkhur lehzual nan Dan ang taka hmalak a tul a ti bawk.
Pu K Lalrinsanga, Motor Vehicle Inspector (MVI) chuan ṭum danga Road Safety Month an hman thin dan report tawi a pe a, traffic rules chungchangah theihtawp an chhuah chungin chhungkua atanga fimkhur tura inzirtirna neih thin a pawimawh hle a ti bawk. Vawiin thutkhawm chuan Siaha mipui ten traffic Dan leh Dun an hriat chian lehzual a, an ngaihpaiwmawh thar leh nan Road Safety Month hman a rel a, a hawnna chu May Ni 16 (Zirtawp Ni) zingkar dar 7:00 ah neih nise a ti a, Road Safety Month chhung hian Ngaihnathiam awmlohna (No tolerance ) hman a ni nghal dawn a ni. He hunah hian sawrkar official te bakah commercial vehicles driver zawng zawng tel vek tura sawm nise an ti bawk a ni.
Vawiin thutkhawmah DC Pu VL Hruaizela Khiangte, Pu K Lalrinsanga, MVI , Pu Lalnunhlua SDPO, te bakah MADC Road Transport aiawhte, MPWD aiawhte, MTP Gen Hqrts aiawhte leh MCVU aiawhte an kalkhawm ani.
