Chief Minister Pu Lalduhoma’n Education Department buatsaih Chief Minister Award chu vawiin khan kumin Pawl 10 leh pawl 12 zirlai titha zualte hnenah a hlan. Chief Ministers Award hlanna inkhawm hi Aizawl Vanapa Hall ah neih a ni a, Pu Lalduhoma chuan CM award chu sawrkarin MBSE Exam pahniha topper te sorkarin a ngaihhlutzia leh an kal zelna tura duhsakna an tihlanna a ni a ti a, CM Award chu huang dangah pawh sem a nih zel tur thu a sawi. Kumin CM award dawgtu te chu HSSLC Topper Science – Cynthia Lalhlupuii Shangpliang, St. Paul’s HSS.
HSSLC topper Commerce – Kristin Laldinpuii Ralte, Oikos HSS
HSSLC Topper Arts- Lalrammawii Tochhawng, Mt. Carmel School te an ni a, anni bakah hian HSLC topper – PC Lalthakimi, KD High School hnenah hlan a ni bawk a. Chawimawina hian Tangka fai Rs. 50000, Memento leh Citation te a keng tel a ni.
Pu Lalduhoma chuan state thawhchhuah ropui ber chu mihring te theihna a ni ati a, Natural Resource lamah ram chu hausa mahse mipuiin a zir loh chuan chhawr tlak anih loh thin thu a sawi a. Ram mipuite an fin var a, hriatna leh thiamna lama an san chuan, natural resource nei tha ram nilo tepawh ram dang atanga raw material-te lalutin ram hausa takah an indin chhuak thei tho thin thu he hun a hian a sawi.
Pu Lalduhoma chuan Mizoram chu ziak leh chhiar thiam tamna state a ni ati a, report thar ber a lo chhuak dawn hnai ni a sawi in, Mizoram chu India rama ziak leh chhiar thiam tamna ber state a nih ngei a rin thu a sawi bawk. Zirna lamah sawrkarin ngaihtuahna an sen nasat laiin sum leh pai dinhmun mila kal a ngai a, chak taka thil tih zung zung a harin Sawrkar chu a tumah a chiang a, phak tawk anga kal zel a tum a ni a ti.
