Vawiin khân DC Mini Conference Hall, Siahaah Ruihhlo do chungchang Pu K. Sapdanga, Home Minister hovin sawiho a ni a, ruihhlo do lam khawih department official bakah tlawmngai pawl hruaitute, MJA aiawh leh khawtlang hruaitute an tel. Pu VL. Hruaizela Khiangte, district bawrhsap chuan he hun hi kaihhruaiin, hun chep tak karah Home Minister-in Siaha District a lo tlawh thei chu lawmthu a sawi a, ‘Siaha District-a Ruihhlo lo lut hi ram dang (Myanmar) ni lovin District dang aṭanga lo lut a ni tlângpui a, chuvangin luhka pawimawh hmun li (4) ah endikna hmun ruahman a ni’ a ti. Home Minister Pu K. Sapdanga chuan thu sawiin, ‘Sawi duh neia lo kal kan nih aiin Ruihhlo dotute thusawi ngaithla tura lo kal kan ni,’ a ti. Mizorama tlawmngai pawl hrang hrangte thawhrimna an hriatpui thu leh an tha tihchak chhunzawm zêl chu an tum anih thu Minister hian sawiin, ‘Tlawmngai pawl tha thawh tawhna zawng zawngah lawmthu ka sawi a, an tha aia chak hi a awm loh avangin an phurna tichak zawnga hma lakna khawp sum leh pai leh facility hi chu a awm turah ngaih a ni a, District Administration kaltlangin ṭul leh mamawh thlen nise anniin home department lamah an lo thehlut zel dâwn a ni,’ a ti bawk.
Tlawmngai pawl leh sawrkar hnathawk chu mipui rawngbawltute ve ve an nih thu leh, lungrual taka thawhho thiam a ṭul thu Home Minister hian sawiin, ‘Kan tu leh fate seilenna tläk khaw nuam leh changkang din tumin tun aia ṭang lehzual tûrin kal khawmte a sàwm bawk.Mizorama ruihhlo luhka bêr ṭhin – hmar lam leh khawchhak lamah uluk taka ven leh hma lâk anih avangin hmun dangah hlet a chhuah hlauhthawn thuah ramri hrul district tlawhkuala, an thu leh hla ngaihthla paha sawihona hlawkthlak tâk neih ṭhaa an hriat avanga tlawh anih thu a sawi. Sawrkar leh tlawmngai pawlin ruihhlo do kawngah chak taka hma a lâk avangin ruihhlo man a to a, a tiṭhîn pawhin an nghei phah a, khawpui chhung a ralmuangin zana vak rawlai an tlêm phah pawh hi thil ṭha tâk a nih thu Minister hian sawiin, Ruihhlo ngaite hi damlo enkawla enkawl annih hian an damlo dêr nasa a, hlahthlem bîk chi an niin a lang lo. Covid19 lên laiin ruihhlo a lo lut lo va, ruihhlo ngai; an nghei vanga thi an tam phah chuang tlat lo, rilru lama a thawh tel vang ni maiin a hriat. Chuvangin a dim zawng ni lova enkawl a ngamawm anih hi kan ti, a ti bawk.
Pu Manjeet Singh Shankla, SP, Siaha chuan Siaha District Enforcement Force in Ruihhlo do kawnga hma an lakna powerpoint presentation hmangin a nei a, Pu TC. Lalropuia, Assistant Commissioner, Excise and Narcotics in an hnathawh report a pek bakah department leh NGOs aiawh kal ten an hma lakna an sawi bakah an ngaimawh zawng an sawi bawk. Pu VL. Hruaizela Khiangte, district bawrhsap in lawmthu sawina a nei a, ṭhutkhawm tihtawp a ni.
